Россиянинг Украинага қарши қўшилган ҳаракатларини тўхтатиш режаси йўқ. Бу ҳақда Россия Бош штаби бошлиғи Валерий Герасимов расмий баёнот берди.
Унинг сўзларига кўра, «қўшинлар (кучлар) бирлашган гуруҳи махсус ҳарбий операция доирасидаги вазифаларни ҳужум амалиётлари билан бажаришни давом эттиради». Шунингдек, у куз мавсумидаги йўналишлар учун қўшинлар олдига қўйиладиган мақсадлар янгидан белгилаб олинишини таъкидлади.
Герасимовнинг нутқи акс этган видеони Россия Мудофаа вазирлиги эълон қилди. Унда 2025 йил баҳор-ёз кампанияси натижалари сарҳисоб қилингани ва кейинги босқич вазифалари белгилаб олингани айтиб ўтилди.
— «Стратегик ташаббус тўлиқ Россия Қуролли Кучлари қўлида», — деди у. Герасимовнинг таъкидлашича, ҳозирги пайтда Россия армияси Луганск ҳудудининг қарийб 99,7 фоизини, Донецкнинг 79 фоизини, Запорожьенинг 74 фоизини ва Херсон вилоятининг 76 фоизини назорат қилмоқда.
Шу билан бирга, Герасимов 28 ва 30 август кунлари Украинага қаратилган оммавий зарбалар «ҳарбий-саноат комплексига алоқадор объектларга йўналтирилганини» билдирди. Бироқ ОАВ хабарларига кўра, зарбалардан сўнг Киевда кўп қаватли уй подьезди вайрон бўлган, 25 киши, жумладан тўрт нафар бола ҳалок бўлган, бошқа ҳудудларда эса фуқаролик инфратузилмасига катта зарар етган.
Умумий ҳисобда Россия армияси Украина ҳудудининг тахминан 20 фоизини назорат қилади. Бироқ ушбу ерларнинг катта қисми урушнинг дастлабки ҳафталарида эгалланган. Deep State маълумотларига кўра, урушнинг охирги 1010 куни мобайнида Россия бор-йўғи 5842 км² майдонни ўз қўлига олган, бу эса мамлакат ҳудудининг атиги 0,97 фоизини ташкил этади.
The Economist таҳлилчилари ҳисобича, 2025 йил ёзига келиб Россия армияси ҳар 0,038 км² майдон учун битта ҳарбийни йўқотган. Уларнинг фикрига кўра, бундай суръатда Донецк, Луганск, Запорожье ва Херсон вилоятларининг маъмурий чегараларига энг эртаси 2029 йил февралида чиқиш мумкин. Украина ҳудудини тўлиқ босиб олиш учун эса яна қарийб 89 йил кураш олиб бориш зарур бўлади.
«Замин»ни Telegram’да ўқинг!
