АҚШ президенти Доналд Трамп Ҳиндистон бош вазири Нарендра Моди билан телефон орқали суҳбатда Ню-Деҳли ўз номзодини тинчлик бўйича Нобел мукофотига қўйиши зарурлигини назарда тутгани катта норозиликка сабаб бўлди. Бу ҳақда The New York Times нашри суҳбатдан хабардор манбаларга таяниб маълум қилди.
Маълумотга кўра, мазкур воқеа президент ва бош вазир ўртасида 17 июн куни бўлиб ўтган мулоқотда содир бўлган. Суҳбат пайтида Трамп Модига Покистон томонидан АҚШ етакчисини Ню-Деҳли ва Исломобод ўртасидаги отишмаларни тўхтатишдаги роли учун Нобел мукофотига илгари суриш режалаштирилаётганини билдирган. Кейинчалик Покистон ҳукумати бу таклифни амалга оширган.
NYT манбаларига кўра, Трампнинг фикрлари Модига «Покистон билан бир хил позицияни эгаллаш кераклигига ишора» бўлиб туюлган. Ҳиндистон раҳбари эса бу гапдан қаттиқ ғазабланиб, АҚШнинг отишувларни тўхтатиш бўйича келишувга ҳеч қандай алоқаси йўқлигини қайд этган. Шунингдек, Модининг Трамп номзодини қўллаб-қувватламаслиги сиёсий алоқалардаги муносабатларни сезиларли равишда ёмонлаштирди, дея ёзади NYT.
Трампнинг номзодини Покистондан ташқари яна олтита давлат қўллаб-қувватлади. The Economist таъкидлашича, АҚШ президенти бу мукофотни қўлга киритишни жуда ҳам орзу қилмоқда.
Шу билан бирга, икки давлат муносабатларининг совушига АҚШ томонидан Ҳиндистон маҳсулотларига нисбатан жорий этилган янги божлар ҳам таъсир кўрсатди. Frankfurter Allgemeine Zeitung маълумотича, Трамп сўнгги ҳафталарда Моди билан тўрт марта телефон орқали боғланишга ҳаракат қилган, аммо Ҳиндистон бош вазири суҳбатдан бош тортган.
Бундан ташқари, Трамп Ҳиндистон иқтисодиётини «ўлик» деб атагани ва мамлакатнинг Россиядан нефть сотиб олгани учун ҳинд товарларига қўшимча 25 фоизлик божлар жорий қилгани ортидан муносабатлар янада таранглашди. Ушбу чоралар 27 августдан кучга кирди ва энди Ҳиндистон маҳсулотларининг АҚШга импорти учун умумий бож 50 фоизни ташкил этмоқда.
Бу воқеалар Вашингтон ва Ню-Деҳли муносабатларида янги инқироз нуқтасига айланди. Трампнинг Нобел ишораси ортидан икки давлат ўртасидаги сиёсий алоқаларда кескин ўзгаришлар кузатилиши мумкинлиги айтилаяпти.
«Замин»ни Telegram’да ўқинг!
