Россия президенти Владимир Путин АҚШ президенти Доналд Трамп маъмурияти томонидан ишлаб чиқилган Украина бўйича тинчлик режаси ҳақида фикр билдирди. Унинг таъкидлашича, мазкур ҳужжат Россия-Украина ўртасидаги узоқ йиллик тўқнашувни дипломатик йўл билан ҳал қилиш учун муайян пойдевор вазифасини бажариши мумкин.
Путин Россия режага доир матнни расман олганини тасдиқлади. Бироқ у бугунгача Москва билан батафсил муҳокама ўтказилмаганини айтди. Бунинг асосий сабаби сифатида у Украина ҳукумати ҳозирча таклиф этилган шартларга розилик билдирмаётганини кўрсатди.
Президент қуйидагиларни таъкидлади:
«Аляскадаги музокаралардан кейин Америка томонида маълум танаффус кузатилди. Бу эса, эҳтимол, Украина томонининг Трамп таклиф қилган аввалги режадан воз кечгани билан боғлиқ. Шундан кейин 28 банддан иборат янгиланган – модернизация қилинган вариант пайдо бўлди. Бизда бу матн бор, уни алоқа каналлари орқали олдик. Менимча, у келгусида тузиладиган тинчлик келишувига асос бўлиши мумкин. Аммо ҳозирча биз билан унинг мазмуни батафсил муҳокама қилинмаган. Сабабини тахмин қилиш мумкин – Украина рози эмас».
Путин, шунингдек, Киев ва унинг Европа ҳамкорлари ҳали ҳам «жанг майдонида Россияни стратегик тарзда мағлуб этиш мумкин» деган иллюзияда эканини билдирди. У бундай позиция реал вазиятдан йироқлигини, объектив маълумотлар етишмаётганини таъкидлади.
Мазкур режа ҳақида аввалроқ Axios нашри хабар берган эди. Ҳужжат қоралама деб баҳоланган бўлса-да, унинг ҳақиқийлигини ҳам Украина, ҳам АҚШ манбалари тасдиқлаган. Режада Украинанинг бир қатор ҳудудий ва ҳарбий имкониятларига оид чуқур ён беришлари борлиги айтилади. Шунинг учун ҳам айрим Европа давлатлари бу таклифга кескин қарши чиқмоқда — уларнинг фикрича, бундай шартлар Украина хавфсизлигига катта таҳдид солиши мумкин.
Шу билан бирга, Зеленский Вашингтон билан янги режа устида техник даражада ишлашга тайёрлигини билдирган. Унинг таъкидлашича, Украина тинчликка эришишни истайди, аммо бунда халқнинг қадр-қиммати ва миллий манфаатлар биринчи ўринда туриши керак.
Жаҳон сиёсий майдонида қизғин муҳокамага айланиб улгурган мазкур ҳужжат атрофидаги баҳслар ҳали давом этиши аниқ. Чунки ҳар бир банд, ҳар бир принцип Украина келажагига ва Европа хавфсизлигига бевосита таъсир кўрсатади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
