Трамп жорий этган миллионлик “олтин карта”ни ким олди?
Дональд Трамп ташаббуси билан йўлга қўйилган, камида 1 миллион долларлик инвестиция эвазига АҚШда яшаш ҳуқуқини берувчи «олтин карта» дастури доирасида ҳозирча фақат бир нафар хорижлик харидор тасдиқланди. Мазкур лойиҳа хорижий сармоядорларни жалб қилиш ва давлат бюджети тақчиллигини камайтириш мақсадида ишлаб чиқилган бўлиб, у эскирган EB-5 инвестицион тизимининг ўрнини босиши кутилмоқда. Савдо вазири Говард Лутникнинг таъкидлашича, ҳозирда юзлаб талабгорлар навбатда турибди ва ушбу йўналишда жами 1,3 миллиард долларлик қизиқиш билдирилган. Ҳозирча «олтин карта»нинг илк соҳиби ким эканлиги ошкор этилмаган.
АҚШ президенти Дональд Трамп ташаббуси билан йўлга қўйилган камида 1 миллион долларлик “олтин карта” дастури ҳозирча кутилганидек оммалашмаган. Associated Press хабарига кўра, ушбу имтиёзли картани шу пайтгача атиги бир нафар хорижлик харид қилган.
Мазкур “олтин карта” чет эл фуқароларига АҚШ ҳудудида қонуний яшаш ва ишлаш имконини бериши, кейинчалик эса фуқаролик олиш учун йўл очиши билан аҳамиятли ҳисобланади. Дастур ўтган йил декабрь ойида ишга туширилган.
Савдо вазири Говард Лутник бу йўналишда умумий ҳисобда 1,3 миллиард долларлик “савдо” амалга оширилганини айтган. Бироқ ҳозирча “олтин карта”ни айнан ким сотиб олгани ошкор этилмаган.
Маълумотларга кўра, Дональд Трамп ушбу ғояни 2025 йилда илгари сурган бўлиб, дастлаб картанинг нархи 5 миллион доллар этиб белгиланган эди. Унинг таъкидлашича, бундай ташаббус орқали хорижий сармоядорлар ва иқтидорли мутахассисларни жалб қилиш, шунингдек, давлат бюджетига қўшимча даромад киритиш мақсад қилинган.
Янги дастур узоқ йиллардан бери амал қилиб келаётган EB-5 инвестицион дастурининг ўрнини босиши керак. Унга кўра, камида 1 миллион доллар сармоя киритиб, 10 та иш ўрни яратган шахслар АҚШда яшаш ҳуқуқини қўлга киритиши мумкин.
“Ҳозирча фақат битта харидор тасдиқланган бўлса-да, юзлаб талабгорлар навбатда турибди”, дея таъкидлаган Говард Лутник.
Айни пайтда, АҚШ давлат қарзи 31,3 триллион долларга етгани, жорий йил бюджет тақчиллиги эса тахминан 2 триллион доллар бўлиши кутилаётгани маълум қилинмоқда. Шу боис бундай инвестицион дастурлар иқтисодий манфаат нуқтаи назаридан муҳим аҳамият касб этмоқда.
Қайд этиш жоиз, бу каби “олтин виза” ёки инвестицион резидентлик дастурлари Буюк Британия, Испания, Греция, Канада каби қатор давлатларда ҳам амалда бўлиб, бой инвесторларни жалб қилишга хизмат қилиб келмоқда.
Изоҳлар 0
…