Сурхондарё вилоятида суд тизими билан боғлиқ яна бир ноқонуний ҳолат фош этилди. Маълум қилинишича, вилоят судининг судья катта ёрдамчиси хизмат мавқеидан фойдаланган ҳолда катта миқдорда пул олишга урингани айтилиб, 53 минг АҚШ доллари билан ушланган.
Ҳолат Давлат хавфсизлик хизмати ҳамда прокуратура органлари ходимлари томонидан ўтказилган тезкор тадбир давомида аниқланган. Маълумотларга кўра, судья катта ёрдамчиси жиноят ишлари бўйича Ангор туман суди иш юритувида бўлган жиноят иши юзасидан судланувчилар фойдасига “ёрдам” беришни ваъда қилган.
У 2 нафар судланувчига нисбатан аниқланган 6,3 миллиард сўмлик зарар миқдорини қайта баҳолаш тўғрисида суд ажрими чиқариш орқали камайтириш, уларга озодликдан маҳрум этиш билан боғлиқ бўлмаган жазо тайинлатиш ҳамда дастлабки тергов даврида қўлланилган “қамоқ” эҳтиёт чорасини бекор қилдиришни ваъда қилгани айтилмоқда.
Эвазига эса судланувчиларнинг қариндошидан 53 минг АҚШ доллари талаб қилган. У ушбу маблағни олаётган вақтда ҳуқуқни муҳофаза қилувчи идоралар ходимлари томонидан ашёвий далиллар билан қўлга олинган.
Мазкур ҳолат суд-ҳуқуқ тизимида ҳалоллик ва қонун устуворлиги масаласи қанчалик муҳим эканини яна бир бор кўрсатди. Суд ишларига таъсир ўтказиш, жазони енгиллаштириш ёки эҳтиёт чорасини бекор қилдириш ваъдаси орқали пул талаб қилиш қонун олдида оғир жиноят сифатида баҳоланади.
Ҳозирда ушбу шахсга нисбатан Жиноят кодексининг 168-моддаси 4-қисми “а” банди, яъни жуда кўп миқдорда фирибгарлик, шунингдек, 28, 211-моддаси 1-қисми билан жиноят иши қўзғатилган. Айни пайтда тергов ҳаракатлари давом этмоқда.
Тергов давомида ушбу ҳолатга алоқадор бошқа шахслар бор-йўқлиги, ваъда қилинган ҳаракатлар қай даражада амалга оширилиши мумкин бўлгани ҳамда пулнинг асл мақсади ҳуқуқий жиҳатдан ўрганилади.
Бундай воқеалар фуқаролар учун ҳам муҳим сигнал бўлади: суд ёки тергов масалалари фақат қонуний йўл билан ҳал қилиниши керак. “Пул берсам, иш битади” деган фикр нафақат адолатга, балки одамнинг ўзига ҳам жиддий хавф туғдиради. Қонундан айланиб ўтишга уриниш кўпинча тўғридан-тўғри жиноят ишига олиб боради.
“Zamin”ни Telegram'да ўқинг!
