Италиялик журналист Шомуродовнинг келажаги ҳақида маълумот берди

Ўтган мавсумни "Кальяри"да ижара асосида ўтказган ҳужумчи Элдор Шомуродов тез орада "Рома"га қайтади. Биз Ўзбекистон МТЖ ҳужумчисининг келажаги ҳақида кальярилик таниқли журналист Элиа Серро билан кичик суҳбат уюштирдик.

— Элдорнинг "Кальяри"даги мавсумини қандай баҳолайсиз?
— Мавсум бошида бир қатор муаммолари бор эди. Яхши формада эмасди, сабаби "Специя" ва "Рома"да кам ўйнаганди, шунингдек оёқ жароҳати ҳам катта муаммо эди. У мавсумнинг иккинчи қисмида 3та гол ва 3та ассист қайд этган ҳолда "Кальяри" лигада қолишида жуда муҳим роль ўйнади. Умуман олганда бу ўйинчи учун муваффақиятли мавсум деб ўйлайман.

— Унинг заиф ва кучли томонлари ҳақида нима дея оласиз?
— Шубҳасиз, унинг кучи тўпсиз катта иш кўламини бажаришидадир. У тўп билан ҳам яхши ўйнайди, аммо унинг босим уюштириши ва курашиши ажойиб. Шунингдек, у тўпсиз ҳаракат қилганда шериклари учун вазиятлар яратади. Салбий жиҳатларига келсак, унга ностабил жисмоний формасини киритган бўлардим. У йиғилиб қолган жароҳатлар сабаб бутун ўйинда туриб бера олиши қийин.

— Нима деб ўйлайсиз, у "Кальяри"да қолиши мумкинми?
— Унинг келаси мавсумни "Кальяри"да ўтказишига ишончим комил эмас. Клубда харид қилиш ҳуқуқи бор, аммо 9 миллион евро эвазига. Клубда бундай пуллар бор дея олмайман. "Кальяри" "Рома" билан янги ижара ёки харид қилиш нархини туширишга уриниб кўриши мумкин. Гап Элдорнинг сифатида эмас, клубнинг молиявий ҳолатида, — деди журналист.

Форвард ўтган мавсум "Кальяри" сафида барча мусобақаларда 23та ўйинда майдонга тушиб, 3та гол ва 3та ассист қайд этди. «Замин» янгиликларини «Вконтакти»да кузатиб боринг