Италия сафида 2006 йилда жаҳон чемпиони бўлган Фабио Каннаваро орадан йигирма йил ўтиб мураббий сифатида мундиалда қатнашади. Унинг Ўзбекистон миллий жамоасига бош мураббий этиб тайинланиши хориж ОАВ ва мутахассислар орасида кенг муҳокама туғдирди — кимдадир катта умид, кимдадир эса шубҳа.
Кулги, табрик ва ишонч — Италия сафидан
-
Миллий жамоанинг ҳозирги устози Женнаро Гаттузо одатий ҳазили билан:
«Каннаварога қўнғироқ қилиб, ‘атир сепиб, сочингни геллаб мундиалга кетяпсан, мен эса йўлланма учун жангдаман’, дедим», — деб вазиятни кулиб эслади. -
ФИФА президенти Жанни Инфантино биринчилардан бўлиб табрик йўллаб, Каннаваро 20 йил олдин Италия сардори сифатида Кубокни кўтаргани, энди эса Ўзбекистон бош мураббийи сифатида жаҳон чемпионатига бораётганини алоҳида таъкидлади.
-
Машҳур мутахассис Фабио Капелло бу тайинловни «жуда тўғри қарор» дея баҳолади: «У катта тажрибага эга ва албатта Ўзбекистонга ёрдам беради».
ОАВдаги турли кайфият: «янги саҳифа» ёхуд «катта хато»?
-
Испаниянинг AS нашридан Алехандро Сато: «Каннаваро мураббийликдаги илк жиддий чақириққа дуч келди. Ривожланиш босқичидаги термадан рақобатбардош лойиҳа яратиш — қизиқарли, бироқ жуда мураккаб вазифа».
-
FoxSports (АҚШ): «Ўзбек футболи тарихида янги саҳифа очилди».
-
Испан шарҳловчиси Хосе Давид Лопес эса кескинроқ: «Бу — катта хатодир», — дея ёзди.
Карикатура, «Сити» мухлислари ва Ҳусанов омили
-
Карикатура устаси Омар Мўманий тайинловдан олдиноқ кулгу-ишора билан: «Энг хурсанд — Абдуқодир Ҳусанов бўлади», деб ёзган — иккиси ҳам марказий ҳимоя мактаби вакиллари эканига ишора.
-
Ижтимоий тармоқларда «Манчестер Сити» мухлислари Каннаваро қўлида Ҳусанов кўпроқ билим ва тажриба олишига ишониб, ўз кутилмаларини ошкор қилишди.
Шартнома, штаб ва Каннаваронинг досьеси
-
2+3 формуласидаги битим: икки йиллик шартнома, кейин яна уч йилга узайтириш имкони. Каннаварога ватандошлари — Ауженио Албараелла, Троизе Францеско ва Антонио Клименти ёрдам беради.
-
Футболчи сифатида «Наполи», «Интер», «Ювентус», 2006–2009 ёзларида «Реал Мадрид»да ўйнаган. ЖЧ-2006 ғолиби, ўша йилги «Олтин тўп» соҳиби — бу мукофотга эришган ягона ҳимоячи.
-
Мураббийликда эса йўли ғовур-товур: «Гуанчжоу Эвергранд», «Ан-Наср», «Тянцзин», яна «Гуанчжоу», қисқа муддат Хитой термаси, сўнг «Беневенто» ва «Удинезе». Охирги иш жойи — «Динамо» Загреб (2024 йил декабр — 2025 йил апрел), қониқарсиз натижалар сабаб узил-кесил кетган.
Нима кутамиз?
Чет эл матбуоти икки хил кайфиятда: бири — «янги саҳифа» дея қувонса, яна бири хавотир билан қарайди. Бироқ факт ўзгармас: Ўзбекистон тарихида илк бор мундиалга бормоқда, Каннаваро эса жамоани жаҳон саҳнасига тайёрлайди. Барқарор таркиб, тўғри танловлар ва психологик барқарорлик — италиялик устознинг асосий синови бўлади. Муваффақият учун мезон эса оддий: мундиалда муносиб ўйин ва натижа.
Мухлислар томонидан айтилганидек: энди сўз — майдонда.
“Zamin”ни Telegram'да ўқинг!
