Роберто Де Зерби Англия Премер-лигасида жон сақлаб қолиш вазифаси бажарилганига қарамай, Тоттенхем жамоасининг аянчли мавсумини шафқатсизларча таҳлил қилишга киришди. Италиялик мутахассис ҳозирги таркибга нисбатан кескин фикр билдириб, фақат саноқли ўйинчиларгина клуб талабларига жавоб бера олишини таъкидлади. Бу ҳақда Goal.com хабар беради.
Тоттенхем сўнгги турда Эвертон устидан 1:0 ҳисобида ғалаба қозониб, Чемпионшипга тушиб кетиш хавфидан қутулиб қолди. Жоау Палиньи томонидан киритилган гол жамоага муҳим уч очкони тақдим этди ва Спурснинг элитадаги ўрнини сақлаб қолди. Бироқ, Де Зерби узоқ вақт байрам қилиш ниятида эмас.
Брайтон собиқ мураббийи жамоани бутунлай қайта қуриш лойиҳасига эътибор қаратмоқда. Унинг фикрича, агар клуб келгуси мавсумда ҳам бундай азобли кунларни бошдан ўтказишни хоҳламаса, ҳозирги таркибнинг катта қисмидан воз кечиши керак. Мураббий кийиниш хонасидаги футболчиларнинг ярмидан кўпи ёзда жамоани тарк этиши мумкинлигига ишора қилди.
"Бугун тундан бошлаб биз янги жамоани шакллантиришимиз ва ташкил қилишимиз керак. Менимча, жуда кўп ўйинчиларни алмаштиришимиз лозим. Таркибда қолишга лойиқ бўлган атиги 10, 11 ёки 12 нафар футболчимиз бор, холос. Биз таркибни юқори савиядаги ижрочилар билан тўлдиришимиз шарт", — деди Де Зерби журналистларга.
Италиялик мутахассис клуб бошқа ҳеч қачон бундай оғир вазиятга тушиб қолмаслигини таъминламоқчи. Мавсумнинг иккинчи ярмини турнир жадвалининг қуйи қисмида ўтказган мураббий раҳбариятдан трансферлар бўйича фаолликни талаб қилмоқда. У Тоттенхем каби клуб сўнгги сонияларгача жон сақлаш учун курашмаслиги кераклигини қатъий таъкидлади.
“Zamin”ни Telegram'да ўқинг!
