Аргентина терма жамоаси ва унинг мухлислари енгил нафас олишлари мумкин: юлдузли ҳужумчи Лионель Месси Жаҳон чемпионати бошланишига уч ҳафта қолганида жиддий жароҳатдан қутулиб қолди. Интер Миами клуби дастлабки тиббий кўрик натижаларига кўра, футболчининг чап сон мушаклари чўзилганини маълум қилди. Бу ҳақда Goal.com хабар беради.
38 ёшли футболчининг майдонга қайтиш муддати унинг клиник ва функционал тикланиш жараёнига боғлиқ бўлади. Аргентинанинг Ла Насион нашри ва бошқа ОАВ хабарларига кўра, саккиз карра "Олтин тўп" соҳиби тикланиши учун тахминан ўн кун вақт керак бўлади.
MLS чемпионатидаги танаффус олдидан ўтказилган сўнгги учрашувда Интер Миами жамоаси Пҳиладелпҳиа Унион устидан 6:4 ҳисобида ғалаба қозонди. Ўйиннинг 73-дақиқасида Лионель Месси кутилмаганда чап сонини ушлаган ҳолда захирага олинишини сўради ва майдонни тарк этди.
"У жуда чарчаган эди. Майдон оғир эди, шунинг учун ортиқча чарчоқ ва хавфни олдини олиш мақсадида уни алмаштиришга қарор қилдик", — дея вазиятга изоҳ берди Миами жамоасининг аргентиналик мураббийи Гуиллермо Ҳоёс.
Амалдаги жаҳон чемпионларининг турнирдаги илк ўйини 16-июн куни Канзас-Сити шаҳрида Жазоир терма жамоасига қарши бўлиб ўтади. Аргентина ҳозирча ўзининг якуний таркибини эълон қилмаган, 39 ёшга тўлаётган Лионель Месси эса олтинчи бор Жаҳон чемпионатида иштирок этиши борасида якуний қарорини айтгани йўқ.
“Zamin”ни Telegram'да ўқинг!
