Энрике Риқуелме Реал Мадрид президентлиги учун курашда Флорентино Перезга жиддий рақиб бўлишини эълон қилди. Президентликка номзод агар сайловда ғалаба қозонса, жамоага икки нафар жаҳон даражасидаги юлдузни олиб келишга вада берди. Испаниянинг АБК нашрига берган интервюсида Риқуелме: "Биз аллақачон икки халқаро юлдуз билан шартнома имзоладик", — дея таъкидлади. Бу ҳақда Goal.com хабар беради.
Риқуелме бу шунчаки оғзаки келишув эмас, балки юридик кучга эга бўлган ҳужжат эканлигини билдирди. Унинг сўзларига кўра, ушбу футболчилар клубнинг қисқа, ўрта ва узоқ муддатли спорт лойиҳаси учун ўта муҳим ҳисобланади. Номзод ҳозирча юлдузларнинг исмини очиқламади, бироқ яқин икки ҳафта ичида барча тафсилотлар маълум бўлишига шама қилди.
Шунингдек, Риқуелме клубнинг ҳозирги бошқарув тизимини кескин танқид остига олди. Унинг фикрича, Реал Мадрид ўзининг тарихий ДНКсини, қадриятларини ва профессионаллигини йўқотган. Номзод клуб иерархиясида тартиб йўқлигини ва раҳбарият Реал Мадрид нима эканлигини тушунмай қолганини айтди.
Мураббийлар масаласига тўхталар экан, Риқуелме Хосе Моуриньо қайтишини рад этди, лекин Хаби Алонсо борасидаги қарорни хато деб ҳисоблашини билдирди. Унинг фикрича, Леверкусен билан тарихий натижа қайд этган Алонсога етарлича вақт ва ваколат берилмаган. Риқуелме Мадрид мухлислари клубдаги бундай беқарорликдан норози эканлигини қўшимча қилди.
“Zamin”ни Telegram'да ўқинг!
