Бавария клубидан ижарага олинган Жоау Палиньи Англия Премер-лигасида жон сақлаб қолган Тоттенхем сафида ўз келажагини кўраётганини маълум қилди. Португалиялик ярим ҳимоячи мавсумнинг сўнгги турида Эвертон дарвозасига ғалаба голини уриб, жамоасининг элитада қолишини таъминлади. Ушбу қаҳрамонликдан сўнг, Лондон клуби раҳбарияти футболчини тўлиқ сотиб олиш масаласини кўриб чиқмоқда. Бу ҳақда Goal.com хабар беради.
30 ёшли футболчи Тоттенхем мухлисларининг севимлисига айланиб улгурди ва 30 миллион евролик трансфер бандини фаоллаштиришга тайёрлигини билдирди. Жоау Палиньи клубдаги муҳит ҳақида гапирар экан: “Келган кунимдан бери ўзимни уйдагидек ҳис қиляпман. Мухлислар ва клуб даражаси аъло даражада. Ким ҳам Тоттенхемда қолишни истамайди дейсиз? Бу худди никоҳдек гап, мен бу ерда қолишни жуда хоҳлайман”, — дея таъкидлади.
Мавсумнинг сўнгги қисмида жамоа бошқарувига келган Роберто Де Зерби 7 ўйинда 11 очко жамғариб, клубни лигада олиб қолишга муваффақ бўлди. Мураббий аллақачон Жоау Палиньи билан доимий шартнома имзоланишини 100 фоизга қўллаб-қувватлашини очиқчасига айтган. Эндиликда якуний қарор клуб раҳбарияти зиммасида қолмоқда.
Жоау Палиньи Бавария билан 2028-йилга қадар шартномага эга бўлса-да, Мюнхен клуби маошлар фондини бўшатиш учун трансферга рухсат бериши кутилмоқда. Тоттенхем раҳбарияти ёзги трансфер ойнасида бошқа рақиблар аралашмасидан аввалроқ ушбу келишувни якунлаши лозим. Футболчининг ўзи эса келаси мавсум жамоа учун анча муваффақиятли ўтишига ишонч билдирмоқда.
“Zamin”ни Telegram'да ўқинг!
