Манчестер Юнайтед афсонаси Рио Фердинанд ўзининг собиқ жамоасига ёзги трансфер ойнасида Барселона ҳужумчиси Роберт Левандовски билан шартнома имзолашни тавсия қилди. Майкл Каррик бошқарувидаги жамоа Чемпионлар лигаси йўлланмасини қўлга киритган бир пайтда, Фердинанд тажрибали полшалик ҳужумчи жамоа ҳужум чизиғини кучайтириш учун энг мақбул номзод эканлигини таъкидлади. Бу ҳақда Goal.com хабар беради.
Фердинанд ўзининг YouTube каналида берган интервюсида 37 ёшли ҳужумчи Бенжамин Сескко учун ажойиб устоз бўлиши мумкинлигини айтди. "Агар клуб яна бир ҳужумчи олмоқчи бўлса, Левандовски ёмон вариант эмас. Унинг тажрибасига эътибор беринг, Сескко ундан қанчалик кўп нарсани ўрганиши мумкинлигини тасаввур қилинг", — деди собиқ ҳимоячи.
Манчестер Юнайтед ўтган мавсумда РБ Леипзиг клубидан Бенжамин Сескко учун 74 миллион фунт сарфлаган эди. 22 ёшли ҳужумчи Англия Премер-лигасида 11 та гол уриб, ўзини кўрсата бошлади. Фердинанднинг фикрича, Левандовски каби дунё даражасидаги юлдузнинг келиши ёш ҳужумчининг ўсишига ва жамоанинг Чемпионлар лигасидаги иштирокига катта ёрдам беради.
Гарчи фахрий футболчининг маоши юқори бўлиши кутилса-да, Фердинанд бу трансфер мантиқан тўғри эканлигини таъкидламоқда. Барселона билан хайрлашиш арафасида турган Левандовски эркин агент сифатида Манчестерга кўчиб ўтиши мумкин. Эндиликда мухлислар клуб раҳбарияти Фердинанднинг ушбу дадил маслаҳатига амал қилиш-қилмаслигини кутишмоқда.
“Zamin”ни Telegram'да ўқинг!
