Англия терма жамоаси ҳужумчиси Антонй Гордон Нюкасл Юнайтед клубидан Барселона сафига ўтганидан сўнг ўз ҳаяжонини яшира олмади. 25 ёшли футболчининг трансфери Каталония клубига бонуслар билан бирга жами 80 миллион еврога тушди. Гордон янги жамоаси билан 2031-йилга қадар мўлжалланган беш йиллик шартнома имзолади ва болаликдаги орзуси ушалганини таъкидлади. Бу ҳақда Goal.com хабар беради.
Ўтган мавсумда барча мусобақаларда 17 та гол уриб, Нюкаслнинг энг яхши тўпурари бўлган вингер жума куни кечқурун расман таништирилди. Тақдимот маросимида сўзга чиққан Гордон шундай деди: "Барселона варианти жиддий эканини билганим заҳоти, менда ҳеч қандай шубҳа қолмади. Мен ҳар доим ушбу клубда ўйнашни хоҳлаганман. Барселона — сайёрадаги энг катта клуб. Бу ерда бўлиш ҳақиқий орзунинг ушалишидир. Бу катта масъулият, лекин мен бундай чорловга тайёрман".
Шунингдек, Гордон янги жамоадошлари, хусусан, ёш юлдуз Ламине Ямал билан бирга тўп суришни интиқлик билан кутаётганини билдирди. Унинг сўзларига кўра, атрофингда юқори савияли футболчилар қанча кўп бўлса, ўсиш ҳам шунча тез бўлади. Гордон Барселона футболчиларини дунёнинг энг яхшилари деб атади ва улар билан бир сафда бўлишдан фахрланишини айтди.
Ушбу трансфер Бавария каби грандларнинг қизиқишларига нуқта қўйди. Мюнхенликлар Гордонни Гарри Кейн, Майкл Олисе ва Луис Диаз каби юлдузлар билан бирга ҳужум чизиғида кўрмоқчи эди. Эндиликда футболчи бор эътиборини Англия терма жамоаси сафида 2026-йилги Жаҳон чемпионати саралаш ўйинларига қаратади.
“Zamin”ни Telegram'да ўқинг!
