Жанубий Кореянинг Samsung компанияси Хитой материк қисмида маиший техника, жумладан, телевизорлар ва мониторлар савдосини расман тўхтатди. Бу ҳақда бренднинг Хитойдаги расмий веб-сайтида тегишли хабарнома эълон қилинди. Бу ҳақда Ixbt.com хабар беради.
Компания вакилларининг таъкидлашича, ушбу қарор бозор муҳитининг ўзгариши билан боғлиқ. Samsung маҳаллий брендлар, хусусан, Xiaomi ва ТКЛ томонидан кўрсатилаётган кучли нарх рақобати шароитида Хитой ички бозоридаги чакана савдо фаолиятини якунлашга қарор қилди.
Шунга қарамай, Samsung Хитойдан бутунлай чиқиб кетмаяпти. Компания аввал сотиб олинган қурилмаларга хизмат кўрсатишни маҳаллий қонунчилик талабларига мувофиқ давом эттиришини маълум қилди. Шунингдек, Хитойдаги ишлаб чиқариш қувватлари экспорт мақсадларида ишлашда давом этади.
Экспертларнинг фикрича, ушбу қадам Samsung'нинг глобал стратегиясини қайта кўриб чиқаётганини ва фойдаси камроқ бўлган бозорлардан воз кечиб, бошқа ҳудудларга эътибор қаратаётганини англатади.
“Zamin”ни Telegram'да ўқинг!
