Linus Torvalds сунъий интеллект яратаётган кераксиз хатолик ҳисоботларидан чарчади

Код таҳлили учун сунъий интеллект (AI) воситаларининг кенг тарқалиши очиқ кодли операцион тизимлар ишлаб чиқувчилари учун кутилмаган муаммоларни келтириб чиқарди. Линух лойиҳаси асосчиси ва раҳбари Linus Torvalds ядро ҳолати ҳақидаги сўнгги ҳисоботида нейротармоқлар ёрдамида яратилган бир хил турдаги ҳисоботлар билан жамоани кўмиб ташлаётган хавфсизлик тадқиқотчиларини кескин танқид қилди. Бу ҳақда Ixbt.com хабар беради.

Торвалдснинг сўзларига кўра, AI хабарларининг чексиз оқими хавфсизлик бўйича ёпиқ почта рўйхатини бошқариб бўлмайдиган ҳолатга келтирган. Муаммо маълумотларнинг ҳаддан ташқари такрорланиши билан янада оғирлашмоқда, чунки турли одамлар бир хил оммабоп AI воситаларидан фойдаланиб, бир хил кодда айнан бир хил хатоларни топмоқдалар. Линус агар заифлик AI ёрдамида топилган бўлса, уни бошқа биров аллақачон топган бўлиш эҳтимоли жуда юқори эканини таъкидлади.

Линух раҳбари эндиликда нейротармоқлар томонидан топилган хатолар махфий деб ҳисобланмаслигини эълон қилди. Уларни шахсий режимда кўриб чиқиш маъносиз, чунки ҳисобот муаллифлари бир-бирларининг аризаларини кўрмайдилар ва нусхаларни юборишда давом этадилар. Торвалдс AI технологиясига қарши эмаслигини, бироқ у иш кўринишини яратиш ўрнига ҳақиқий фойда келтириши кераклигини айтди. У тадқиқотчиларни ҳужжатларни ўрганишга ва AI маслаҳати асосида тайёр "патч" (тузатиш) ёзишга чақирди.

Ушбу баёнот 2017-йилдан бери деярли барча Линух дистрибутивларига таъсир қилган Копй Фаил (КВЕ-2026-31431) эксплойти фонида янгради. Ушбу критик хато айнан AI ёрдамида бир соат ичида топилган эди, бироқ ўшанда экспертлар ишчи ва тасдиқланган ҳужум кодини тақдим этишган, бу эса уни юзлаб "ахлат" аризалардан ажратиб туради.

Шунга ўхшаш муаммога GitHub платформаси ҳам дуч келмоқда. Компаниянинг хавфсизлик бўйича муҳандиси Жаром Бровн паст сифатли AI ҳисоботлари тўлқини ҳақида огоҳлантирди. Унинг таъкидлашича, нейротармоқнинг хом хулосаси фойдасиз шовқиндир. Бровн хатолар овчиларини миқдорга эмас, сифатга эътибор қаратишга чақириб, битта сифатли текширилган хато ўнта AI тахминидан кўра юқорироқ баҳоланишини эслатиб ўтди.