Muftiy Ukraina himoyasi uchun jangga kirishdi

Ukraina "Umma" musulmonlari idorasi muftiysi Said Ismagilov lavozimidan iste’fo berib, harbiy harakatlarga qo‘shilganini ma’lum qildi. Bu haqida u Facebook sahifasida post qoldirgan.

Uning so‘zlariga ko‘ra, Ismagilov bahorda muftiylik lavozimini tark etib, o‘zini ilm va ummat xizmatiga bag‘ishlashni rejalashtirgan, biroq rus askarlarining Ukrainaga hujumi barcha rejalarni o‘zgartirib yubordi.

"Bu urush men uchun kutilmagan bo‘ldi, demayman. Men dekabr oyidan beri mudofaa batalonida mashg‘ulot o‘tkazib kelayotgan edim. Kreml harakatlarida ijobiy tomonga o‘zgarish, mo‘’jiza yuz berishi mumkinligiga 1 foiz bo‘lsa-da umidim bor edi, ammo unday bo‘lmadi. Shuning uchun B reja, ya’ni jang qilishga qaror qildim", - deydi Ismagilov.

Said Ismagilov 1978 yil Ukrainaning Donetsk viloyatida tug‘ilgan. U "Umma" musulmonlari idorasida muftiy lavozimida 2012 yildan beri faoliyat olib borgan.