Foto: Reuters
Niderlandiyaning Haaga shahrida Yevropa Ittifoqi, AQSH va Xalqaro jinoyat sudi (XJS) prokurorlarini o‘z ichiga olgan xalqaro tergov markazi (ICPA) ish boshladi. U Rossiyaning Ukrainaga bostirib kirishi bilan bog‘liq jinoyatlarni tergov qiladi. Bu haqda Eurojust xabar berdi.
«ICPA tufayli turli mamlakatlarning mustaqil prokurorlari har kuni bir joyda birgalikda ishlashi, dalillarni tez va samarali almashishi, tergov va ta’qib qilishning umumiy strategiyasini kelishib olishi mumkin bo‘ladi».
Qayd etilishicha, markazning tashkil etilishi maxsus tribunal yaratish yo‘lidagi birinchi qadamdir, chunki markaz tomonidan to‘plangan materiallar Ukrainadagi bosqinchilik jinoyati bo‘yicha ish qo‘zg‘atish uchun asos bo‘ladi.
«Shu bilan birga, ICPA kamdan-kam hollarda jinoiy javobgarlikka tortiladigan va standart amaliyotga ega bo‘lmagan xalqaro jinoyat bilan shug‘ullanadi», deyiladi xabarda.
Markaz gumonlanuvchilarni hibsga olish yoki ayblash vakolatiga ega emas, uning vazifasi bunday jinoyatlarni tergov qilishda ishtirok etayotgan davlatlarning harakatlarini muvofiqlashtirish va birinchi navbatda axborot almashishdan iborat.
Dastlabki bosqichda ICPA tarkibiga Ukraina bilan birga Litva, Latviya, Estoniya, Polsha va Ruminiya ham kiradi. ICPA tergovlarida Xalqaro jinoyat sudi tomonidan yordam beriladi.
«Biz Ukraina tarafida emasmiz, biz adolat tarafidamiz», dedi XJS bosh prokurori Karim Xon.
Shuningdek, AQSH ham markaz faoliyatiga yordam berish uchun maxsus prokurorni tayinladi va uning ma’lumotlar bazasini to‘ldirish uchun hissa qo‘shadi.
“Zamin” yangiliklarini “Twitter”da kuzatib boring
