Pokiston-Afgʻoniston chegarasida janglar davom etmoqda

Afgʻon harbiy kuchlari avvalroq Pokiston tomonidan amalga oshirilgan va 46 nafar afgʻon halok boʻlgan havo zarbasiga javoban Pokistonning bir qator hududlariga hujum qildi.

Aniqlanishicha, ikki mamlakat chegarasidagi janglar 27 dekabr oqshomidan beri davom etmoqda.

Afgʻoniston Mudofaa vazirligiga koʻra, afgʻon harbiylari Pokistonning mamlakat hududiga havo hujumlariga javoban “dushman kuchlari va ularning tarafdorlari joylashgan markazlar va boshpanalarga” hujum qilgan.

^{Foto: Getty Images}
Ikki davlat orasidagi 2600 kilometrdan ortiq uzunlikdagi chegara 1893 yilgi Dyurand chizigʻi asosida belgilangan boʻlib, u Afgʻoniston Amirligi va Britaniya Hindistoni oʻrtasidagi chegaralarni belgilash kelishuvi natijasida vujudga kelgan. Afgʻoniston hukumati 1947 yilda Britaniya Hindistoni parchalanib, Pokiston tashkil topganidan soʻng bu chegarani tan olishni toʻxtatdi. 2021 yildan buyon Afgʻonistonni nazorat qilayotgan “Tolibon” ham bu pozitsiyani qoʻllab-quvvatlamoqda.

Eronning Tasnim agentligi ham 27 dekabr kuni kechqurun Afgʻonistonning Xost va Paktiya provintsiyalari chegara hududlarida “Tolibon” tarafdorlari va Pokiston harbiylari oʻrtasida janglar ketayotganini yozgan.

Pokiston 24 dekabr kuni Afgʻonistonning Paktika viloyati Barmal tumaniga havo hujumi uyushtirgan edi.

Vayronalar ostidan 15 kishi, jumladan, ayollar va bolalar jasadi olib chiqilgan. Manbalarga koʻra, Barmal tumanidagi kamida etti qishloq havo hujumiga uchragan. Laman qishlogʻida bir oilaning besh a'zosi, jumladan ayollar va bolalar halok boʻlgan. Qurbonlar soni ortishi mumkin va odamlar vayronalar ostidan jasadlarni olib chiqmoqda.

Mahalliy aholi portlash Pokiston samolyotlari tomonidan amalga oshirilganini aytgan. Aviatexnikalar Xost, Paktiya va Paktika osmonida patrullik qilmoqda.

^{Foto: Havo hujumi oqibatida halok boʻlgan bolalar / Hasht-e Subh Daily}
“Tolibon” javob qaytarishga va'da berdi

“Tolibon” Mudofaa vazirligi Pokistonning Barmal tumanining bir qismiga uyushtirgan havo hujumlarini ochiq tajovuz sifatida qoraladi. Vazirlik hujumlar Pokiston armiyasi tomonidan amalga oshirilganini ta'kidladi.

- “Tolibon” bu shafqatsiz harakatni barcha xalqaro tamoyillarga zid va ochiq tajovuz deb hisoblaydi va uni keskin qoralaydi, deydi vazirlikning rasmiy vakili Inoyatulla Xorazmiy.

U hujumda asosan “vaziristonlik qochqinlar”ni nishonga olingani, bir qancha bolalar va boshqa tinch aholi vakillari halok boʻlgan va yaralanganini aytdi. “Tolibon” hujumni javobsiz qoldirmasliklarini qoʻshimcha qildi.

Al Jazeera'nig ta'kidlashicha, “Tolibon” Afgʻonistonda hokimiyat tepasiga kelgach, “Tahriki Tolibon Pokiston” (TTP) jangarilari Pokiston xavfsizlik kuchlariga chegarada, ayniqsa, Xaybar-Paxtunxva va Balujistonda hujum qilish holatlari koʻpaygan.

Afgʻon toliblari va TTP oʻrtasidagi “simbiotik munosabatlar” yillar davomida davom etib kelgan. Shu sababli, Kobulning Islomobod talabiga koʻra TTP a'zolariga qarshi biron-bir chora koʻrishi ehtimoldan uzoq. Bunday harakat mintaqada “Afgʻonistondagi Islom davlati” kabi boshqa, yanada radikal guruhlarning faollashuviga olib kelishi mumkin. “Zamin” yangiliklarini “Telegram”da kuzatib boring