Argentinada Rossiya josuslari fosh etildi — «Laxta» izi yana paydo bo‘ldi

Argentinada Rossiya manfaatlarini ilgari surishga qaratilgan maxfiy josuslik tarmog‘i fosh etildi. Mamlakat prezidenti Xaviyer Miley matbuot kotibi Manuel Adornining ma’lum qilishicha, Argentina Davlat razvedka kotibiyati (SIDE) Rossiyaga ishlaydigan agentlar faoliyatini aniqlab, ularning maxfiy rejalari va aloqalarini ochiqladi.

Adornining so‘zlariga ko‘ra, rossiyalik josuslar mahalliy fuqarolar bilan yaqin hamkorlikda harakat qilgan va Rossiyaning geosiyosiy manfaatlari yo‘lida shubhali vazifalarni bajargan. Tergov jarayonida «Kompaniya» deb nomlangan maxfiy tuzilma va uning Moskvadagi aloqalari ochiqlangan. Bu tashkilot, ma’lum bo‘lishicha, marhum oligarx Yevgeniy Prigojin bilan bog‘liq bo‘lgan mashhur «Laxta» loyihasi doirasida harakat qilgan.

Argentinadagi tarmoq rahbari Lev Konstantinovich Andriashvili bo‘lib, u turmush o‘rtog‘i Irina Yakovenko bilan birga jamoaning moliyalashtirilishi va tarkibiy rivoji uchun javobgar bo‘lgan. Ularning asosiy vazifasi — Rossiya manfaatlariga sodiq mahalliy shaxslar tarkibidan ta’sir guruhini shakllantirish, mahalliy hokimiyatga qarshi dezinformatsiya kampaniyasini yo‘lga qo‘yish va turli NNT hamda jamg‘armalar orqali ijtimoiy fikrga ta’sir o‘tkazish bo‘lgan.

Ular ijtimoiy tarmoqlar orqali kontent tarqatgan, axborot to‘plash va siyosiy tahlillar bilan shug‘ullangan, shu orqali Rossiya manfaatlari yo‘lida ko‘zga ko‘rinmas frontni shakllantirishga urinishgan. Bu kabi operatsiyalar faqat internetda emas, balki jamiyatning turli qatlamlarida, jumladan, fuqarolik jamiyatida ham amalga oshirilgan.

Adorni tergov doirasidagi ma’lumotlarning barchasi oshkor qilinmaganini, ammo olingan dalillar Rossiya bilan bog‘liq keng qamrovli ta’sir tarmoqlarining mavjudligini isbotlashini ta’kidladi. Ayni vaqtda ushbu shaxslarning hibsga olingani yoki qayerda ekani haqida rasmiy ma’lumot yo‘q.

Bu voqea Argentinada 29 mayda qabul qilingan yangi immigratsiya islohoti fonida yuzaga kelgani bilan yanada jiddiy ahamiyat kasb etdi. Mazkur islohot mamlakatga kelayotgan minglab rossiyaliklarning maqomini qonuniylashtirish imkoniyatlarini cheklab qo‘ydi. Yangi tartiblarga ko‘ra, fuqarolik va doimiy yashash huquqini olish yanada qiyinlashtirildi.

Bu qarorning asosiy sabablaridan biri — onalik turizmini cheklash bo‘ldi. So‘nggi yillarda minglab homilador rossiyalik ayollar Argentinada tug‘ish orqali farzandlari va o‘zlari uchun mamlakat fuqaroligini olishga harakat qilgan. Argentina pasporti 170 dan ortiq davlatga, jumladan, Yevropa Ittifoqiga vizasiz kirish imkonini beradi.

Eslatib o‘tamiz, bu Argentinada rossiyalik agentlar faoliyati fosh etilgan birinchi holat emas. Avvalroq, Artyom va Anna Dulsevlar deb nomlangan juftlik, farzandlari tug‘ilganidan keyin Argentina fuqaroligiga ega bo‘lib, ushbu pasport bilan Sloveniyada josuslik qilgani ma’lum bo‘lgan. Ular 2022 yilda qo‘lga olingan va 2024 yilda Rossiyaga qaytarilgan.

Joriy holat Argentina va Rossiya o‘rtasidagi aloqalarni yanada murakkablashtirishi mumkin. Argentina rasmiylari esa mamlakat suvereniteti va xavfsizligini ta’minlash uchun qo‘ldan kelgan barcha choralarni ko‘rishini bildirmoqda. Shu bilan birga, yangi islohotlar bilan mamlakatga kirish va unda qolish tartibi keskin ravishda nazoratga olinmoqda. “Zamin”ni Telegramʻda oʻqing!