Isroil harbiy-havo kuchlariga tegishli qiruvchi samolyotlar Livanning Litani daryosi shimolida joylashgan beshta hududga aniq zarbalar berdi. Rasmiy ma’lumotlarga ko‘ra, bu yerda “Hizbulloh” harakatiga mansub, gumon qilingan harbiy nuqtalar va infratuzilmalar mavjud bo‘lgan. Hujumlar mahalliy aholida keskin xavotir uyg‘otgan.
Mahalliy fuqaro muhofazasi xizmati “X” ijtimoiy tarmog‘ida tarqatgan xabarda aytilishicha, havo zarbalari Burguz, Jabbur, Jermak, El-Qatraniya va El-Mahmudiya qishloqlari yaqinida amalga oshirilgan. Aholi punktlari chetida shia jangarilari harakatlanayotgani kuzatilgani va shu bois ushbu hududlar asosiy nishonga aylangani ma’lum qilingan.
Guvohlar so‘zlariga ko‘ra, portlashlar va havodan zarbalar tufayli ayrim uylar va xo‘jalik binolariga moddiy zarar yetgan. Hozirgi vaqtda zarar ko‘rgan hududlarda qutqaruv xizmatlari va tibbiy yordam guruhlari faoliyat olib bormoqda. Mahalliy aholi xavfsiz joylarga ko‘chirilayotgani xabar qilindi.
Isroil harbiylari esa ushbu zarbalarni chegara xavfsizligini ta’minlash va “terrorchilik infratuzilmasi”ni yo‘q qilish maqsadida amalga oshirganini ma’lum qildi. Shu bilan birga, Livan rasmiylari ushbu harakatni mamlakat hududiy yaxlitligiga tahdid sifatida baholadi. Xalqaro tashkilotlar esa ziddiyatning kuchayishiga yo‘l qo‘ymaslikka chaqirmoqda.
“Zamin”ni Telegramʻda oʻqing!
