Markaziy Osiyoda odamlarni hayratga solgan voqea qayd etildi. Turkiston viloyatida sud tomonidan chegara orqali noqonuniy yoqilg‘i olib o‘tish bilan shug‘ullangan guruhga nisbatan hukm o‘qildi. Bu haqda nur.kz xabar tarqatdi.
Sud ma’lumotlariga ko‘ra, besh nafar shaxs Sariog‘ash tumani hududida 375 metr uzunlikka ega bo‘lgan maxfiy yer osti tunnelini qazib, uning yordamida 2024 yil avgustidan dekabrigacha qator noqonuniy operatsiyalarni amalga oshirgan. Jami 420 tonnadan ortiq AI-92 markali benzin O‘zbekiston hududiga yashirincha olib o‘tilgani aniqlandi.
Mutaxassislar hisob-kitobiga ko‘ra, ushbu faoliyat oqibatida davlatga 112 million tenge miqdorida zarar yetkazilgan. Bu qariyb 2 milliard so‘mga teng summa ekani ta’kidlandi.
Sud hukmiga binoan, jinoiy guruhning tashkilotchisi 15 yil muddatga ozodlikdan mahrum etildi. Ularning hammasi esa 13 yildan turma jazosiga hukm qilindi. Shu bilan birga, ayblanuvchilarning bir qator mulklari – 3 million tenge miqdoridagi mablag‘lar, 16 ming litr benzin hamda bir nechta yuk avtomashinalari davlat ixtiyoriga musodara qilindi.
Rasmiy ma’lumotlarga ko‘ra, hukm hali qonuniy kuchga kirmagan va tomonlar apellyatsiya berishi mumkin. Ammo bu holat qo‘shni mamlakatlar chegarasida nazorat va xavfsizlik masalalari yanada kuchaytirilishini talab qilayotganini ko‘rsatmoqda.
Ekspertlar fikricha, bu kabi tunnellar orqali olib borilgan noqonuniy operatsiyalar nafaqat iqtisodiy zarar keltiradi, balki chegara xavfsizligi uchun ham jiddiy tahdiddir. Shu bois, bu ish nafaqat Turkiston viloyatida, balki butun mintaqa bo‘ylab katta shov-shuv uyg‘otdi.
