Yevropa Ittifoqi tomonidan Rossiyaga qarshi joriy etilayotgan sanksiyalar bugungi kunda nafaqat umumiy iqtisodiyotga, balki neft eksporti kabi asosiy sohaga ham jiddiy ta’sir ko‘rsatmoqda. Ammo Yevropa diplomatiyasi rahbari Kaya Kallasning fikricha, ushbu cheklovlar AQSHning to‘liq qo‘llab-quvvatlashi bilan yanada sezilarli va kuchli natijalar berishi mumkin.
Estoniyalik siyosatchi Die Welt gazetasiga bergan intervyusida ta’kidlaganidek, Rossiya iqtisodiyoti hozir “og‘ir kunlarni” boshdan kechirmoqda. Moskva Ukrainadagi uzoqqa cho‘zilayotgan harbiy harakatlarini moliyalashtirish uchun zarur mablag‘larni yo‘qotmoqda. Bu holatning asosiy sababi sifatida Yevropa Ittifoqi tomonidan kiritilgan sanksiyalar ko‘rsatilmoqda.
Kaya Kallas ma’lum qilganidek, hozirda Yevropa Ittifoqi Rossiyaga qarshi 19-sanksiya paketini ishlab chiqish ustida ish olib bormoqda. Unga ko‘ra, avvalgi cheklovlar allaqachon samara ko‘rsatgan. Masalan, Rossiyaning “soya floti”ga qarshi joriy etilgan choralar orqali Boltiq va Qora dengiz yo‘nalishlaridagi neft tashishdan keladigan daromad bir hafta ichida qariyb 30 foizga kamaygan.
“Yevropa Ittifoqining sanksiyalari tufayli Rossiya milliardlab dollar yo‘qotdi. Bu mablag‘lar endi Rossiyaning harbiy mashinasini ta’minlash va qo‘llab-quvvatlash uchun yo‘naltirilmaydi”, — dedi Yevropa diplomatiyasi rahbari.
Shu tariqa, Kaya Kallasning bayonoti Yevropa Ittifoqi sanksiyalari nafaqat moliyaviy, balki strategik jihatdan ham Rossiyaning iqtisodiy imkoniyatlarini cheklab qo‘yganini ko‘rsatmoqda. Kelgusida AQSHning to‘liq sherikligi va qo‘llab-quvvatlashi bilan bu jarayon yanada kuchayishi mumkinligi qayd etilmoqda.
