Fransiyaning Gavr shahrida juda dahshatli hodisa ro‘y berdi. Ikki yoshli Ismoil ismli bola o‘z uyida katta kalamush hujumiga uchrab, jiddiy shikastlandi. Bu voqea nafaqat oilaning, balki butun mahalla aholisining qattiq noroziligiga sabab bo‘ldi. Chunki ular ko‘p yillar davomida antisanitariya va kemiruvchilar ko‘pligidan shikoyat qilib kelayotgan bo‘lsalar-da, tegishli choralar ko‘rilmagan. Bu haqda Daily Mail xabar berdi.
Ota-onaning so‘zlariga ko‘ra, Ismoil kechasi uyquda bo‘lgan paytda kalamush tomonidan hujumga uchragan. Onasi uni qon va kalamushning izlari bilan ifloslangan holda topgan. Bolaning qulog‘i jiddiy shikastlangan — kemiruvchi uning bir qismini chaynab tashlagan. Shuningdek, uning yuzi va qo‘lida ham yaralar aniqlangan.
Jabrlanuvchining onasi qattiq iztirob ichida shunday dedi:
“Eng yomon ko‘rgan dushmanim ham o‘z farzandini mening bolam kabi holatda topishini istamasdim”.
Mahalliy OAV ma’lumotlariga ko‘ra, kichkintoy hujum paytida shunchalik qo‘rqib ketganki, hatto qichqirib ham ulgurmagan.
Ismoil shifoxonaga olib borilgandan so‘ng, qo‘lida og‘ir infeksiya kuzatildi va uning ahvoli hanuz og‘irligicha qolmoqda. Shifokorlar qulog‘ini qayta tiklash yoki teri transplantatsiyasi amaliyoti haqida o‘ylamoqdalar.
Fojea sodir bo‘lgan binoning aholisi esa bu birinchi marta emasligini aytishmoqda. Ular kalamush muammosi yuzasidan bir necha bor shikoyat qilganlar, ammo boshqaruv kompaniyasi hech qanday samarali chora ko‘rmagan. Bu esa aholining xavfsizligi uchun jiddiy tahdid bo‘lib qolmoqda.
“Zamin”ni Telegramʻda oʻqing!
