Kanadaning mashhur Marineland okeanariumi og‘ir moliyaviy inqiroz sabab 30 ta kitni nobud qilish bilan tahdid qildi, deb xabar berdi Bild.
Rahbariyat xabar bildirishicha, agar federal hukumat yordam ko‘rsatmasa yoki hayvonlarni chet elga olib chiqishga ruxsat bermasa, ular “halokatli qaror” qabul qilishga majbur bo‘ladi. Bu haqda hukumatga yuborilgan rasmiy maktubda ma’lum qilingan.
Ma’lumotlarga ko‘ra, Marineland avval Xitoydagi Chimelong Ocean Kingdom bog‘iga hayvonlarni topshirishga uringan, ammo Kanada baliqchilik vaziri Joan Tompson bu taklifni rad etgan. Uning ta’kidlashicha, “kitlar asirlikda yana azob chekishiga yo‘l qo‘yilmaydi”.
Okeanarium ilgari ham tanqid ostida bo‘lgan — 2019-yildan buyon u yerda 20 ta kit halok bo‘lgan. Bu yil yozda esa Marineland eshiklarini ochmadi va sotuvga qo‘yilishi haqida ma’lum qilindi.
Ontario bosh vaziri Dag Ford hayvonlarni qutqarish uchun barcha choralar ko‘rilishini aytdi. Huquq himoyachilari esa rahbariyatni “shantaj”da ayblab, javobgarlikka tortishni talab qilmoqda.
