Ruminiya prezidenti Nikusor Dan Moldova bilan birlashish mavzusidagi referendum g‘oyasiga sovuqqon munosabat bildirdi. Uning ta’kidlashicha, bunday masalada birinchi va hal qiluvchi so‘z — Moldova fuqarolariniki. Hozirgi kayfiyat esa, prezident fikricha, birlashuvni ommaviy qo‘llab-quvvatlash darajasiga chiqmagan.
Dan bu pozitsiyasini Fokshani shahridagi chiqishida ham ochiq aytdi: Moldova — suveren davlat, Ruminiya esa uning fuqarolari xohish-irodasiga hurmat bilan qaraydi. Agar Kishinyovda jamoatchilik fikri bir kun kelib o‘zgarsa, Buxarest ham shu “yangi reallik”ka mos harakat qiladi. Qisqasi, “biz xohlaymiz” degan emotsiya bilan emas, “ular tanlaydi” degan qoida bilan.
Shu bilan birga, Buxarest Moldovaning Yevropa Ittifoqiga qo‘shilish istagini qo‘llab-quvvatlashini alohida urg‘ulamoqda. Ya’ni “birlashuv bo‘lmaydi” degani — “yaqinlashuv to‘xtaydi” degani emas. Aksincha, Ruminiya uchun hozirgi ustuvor yo‘nalish: Moldovaning YEIga integratsiyasi va islohotlar yo‘lini rag‘batlantirish.
Bu fon ortida Moldova prezidenti Maya Sanduning gaplari bahsni yana qizitib yuborgandi. U Britaniyadagi podkast suhbatida, agar birlashuv bo‘yicha referendum o‘tkazilsa, shaxsan Ruiniya bilan birlashishni yoqlab ovoz berishini aytgan. Sandu bunday fikrni Rossiyadan kelayotgan bosim va xavflar bilan izohlagan, “mayda davlat uchun suverenlik va demokratiyani asrash tobora qiyinlashyapti” degan mazmunda signal bergan.
Mazkur g‘oyani Moldova bosh vaziri Aleksandru Muntyanu ham ma’qullagani aytilmoqda.
Natija shunday: Ruminiya tomoni hozir “referendum qilaylik” degan tezkor ssenariyni quvvatlamayapti, Moldova tomonida esa ayrim rahbarlar shaxsiy pozitsiyasini ochiq aytyapti — lekin qaror baribir jamiyatniki. Yaqin oylarda asosiy intriga ham shu bo‘ladi: Kishinyov qaysi yo‘lni tezroq bosadi — ramziy birlashuv muhokamasinimi yoki amaliy YEI integratsiyasinimi. Ha, geosiyosatda “hissiyot” tez yuradi, lekin “ovoz”ni baribir odamlar beradi.
“Zamin”ni Telegramʻda oʻqing!
