AQSH prezidenti Donald Tramp Eronning yangi oliy rahbari lavozimiga nomzodlar Vashington tomonidan ma'qullanishi kerakligini ta'kidladi. ABC News telekanaliga bergan intervyusida Tramp agar bo'lajak rahbar AQSH roziligini olmasa, u taxtda uzoq qololmasligini ochiqchasiga ma'lum qildi. Uning so'zlariga ko'ra, bu chora kelgusi o'n yilliklarda Eron bilan bog'liq muammolarning qayta takrorlanmasligini ta'minlash uchun zarurdir.
Tramp Eronning hozirgi siyosiy doiralaridan ham munosib nomzodlar chiqishi mumkinligini istisno etmadi. Shu bilan birga, u Ali Xominaiyning o'g'li Mojtabo Xominaiyning hokimiyatga kelishini qo'llab-quvvatlamasligini bildirdi. AQSH prezidenti Eron Yaqin Sharqni bosib olishni rejalashtirayotgani va mintaqada hujumkor siyosat olib borayotganini da'vo qildi.
Eslatib o'tamiz, Eron oliy yetakchisi Ali Xominaiy 28 fevral kuni Isroil va AQSH zarbalari oqibatida vafot etgan edi. Ayni damda mamlakatni prezident Mas'ud Pizishkiyon, Oliy sud raisi G'ulom Husayn Muhsiniy va Eron Fiqh kengashi a'zosi Alirizo A'rofiy tarkibidagi Muvaqqat kengash boshqarib turibdi. Yangi oliy rahbar 88 nafar mujtahiddan iborat Ekspertlar kengashi tomonidan saylanishi belgilangan.
Vaziyat yanada murakkablashmoqda, chunki Isroil mudofaa vaziri Isroel Kats ham Eronning yangi rahbari nishonga aylanishi mumkinligidan ogohlantirgan. Xalqaro hamjamiyat Eron ichki siyosatidagi bu o'zgarishlar mintaqaviy xavfsizlikka qanday ta'sir qilishini diqqat bilan kuzatmoqda.
“Zamin”ni Telegramʻda oʻqing!
