Eron Prezidenti Mas’ud Pezeshkian mamlakat tashqi siyosati va ehtimoliy muzokaralar haqida qat’iy fikr bildirdi. Uning ta’kidlashicha, Tehron hech qanday sharoitda “dushman oldida bosh egish” niyatida emas. Shu bilan birga, muloqot yoki muzokaralar olib borish Eronning taslim bo‘lishi yoki o‘z milliy manfaatlaridan voz kechishini anglatmasligi qayd etildi.
Pezeshkian o‘zining X ijtimoiy tarmog‘idagi sahifasida bildirgan munosabatida Eron xalqi huquqlari va mamlakat manfaatlari har qanday diplomatik jarayonda asosiy o‘rinda turishini urg‘uladi. Uning so‘zlariga ko‘ra, muzokara — zaiflik belgisi emas, balki o‘z pozitsiyasini qat’iyat bilan himoya qilish vositasidir.
“Biz hech qachon dushman oldida bosh egmaymiz, agar gap muloqot yoki muzokaralar haqida ketsa, bu taslim bo‘lish yoki chekinish degani emas. Aksincha, maqsad — Eron xalqi huquqlarini himoya qilish va milliy manfaatlarni qat’iyat bilan himoya qilishdan iborat”, — deb yozdi Pezeshkian.
Bu bayonot mintaqadagi siyosiy keskinlik va Eron atrofidagi diplomatik jarayonlar fonida yangradi. So‘nggi vaqtlarda Tehronning xalqaro munosabatlardagi pozitsiyasi, ayniqsa AQSH va G‘arb davlatlari bilan ehtimoliy muzokaralar masalasi keng muhokama qilinmoqda.
Pezeshkianning bildirishicha, Eron muloqotdan qochmaydi, ammo bu muloqot mamlakat sha’ni, mustaqilligi va milliy manfaatlariga zid bo‘lmasligi kerak. Ya’ni Tehron uchun muzokaralar stolga o‘tirish emas, balki o‘z talab va huquqlarini ochiq himoya qilish maydoni sifatida ko‘rilmoqda.
Bu fikrlar Eron rahbariyatining tashqi bosimlar oldida o‘z pozitsiyasini saqlab qolishga intilayotganini ko‘rsatadi. Prezidentning bayonoti ichki auditoriyaga ham, xalqaro hamjamiyatga ham qaratilgan signal sifatida talqin qilinishi mumkin.
Qisqasi, Pezeshkian diplomatiya eshigi yopiq emasligini, ammo bu eshikdan “taslim bo‘lish” shiori bilan emas, milliy manfaatlarni himoya qilish maqsadi bilan kirilishini bildirmoqda. Siyosat tilida aytganda, muloqot bor, lekin shartlar ham bor.
“Zamin”ni Telegramʻda oʻqing!
