Dunyoda millionerlar soni va ularning aholi orasidagi ulushi bo‘yicha yangi reyting tuzildi. Tadqiqot natijalariga ko‘ra, Shveysariya aholisi orasida millionerlar ulushi bo‘yicha dunyoda birinchi o‘rinda turibdi.
Ma’lumotlarga ko‘ra, Shveysariyada katta yoshli aholining 16,45 foizi bir million AQSh dollaridan ortiq sof aktivlarga ega. Bu degani, mamlakatdagi deyarli har oltinchi kishi millioner. Reytingda Lyuksemburg va Honkong ham yuqori o‘rinlardan joy oldi.
Mutlaq raqamlar bo‘yicha esa AQSh hanuz dunyoning boylar markazi bo‘lib qolmoqda — bu yerda 22 milliondan ortiq millioner yashaydi. Ikkinchi o‘rinda Xitoy (6,3 million), undan keyin Fransiya (2,9 million), Yaponiya va Germaniya (har biri 2,7 million) qayd etilgan.
Afrikaning Sahroi Kabirdan janubdagi hududlari, Janubiy Osiyo va Markaziy Amerikaning ayrim mamlakatlarida esa millionerlar ulushi deyarli nolga teng.
Mutaxassislar bu tafovutni iqtisodiy rivojlanish darajasi, moliyaviy tizimning barqarorligi va kapital to‘planish imkoniyatlari bilan izohlamoqda. Shveysariya esa o‘zining bank tizimi, siyosiy barqarorligi va yuqori turmush darajasi tufayli millionerlar uchun eng qulay davlatlardan biri sifatida qolmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
