Fidelity International Chainlink infratuzilmasida tokenlashtirilgan fondni ishga tushirdi
Dunyo bo‘ylab qariyb 1 trillion dollar aktivlarni boshqaruvchi Fidelity International kompaniyasi Moody’s Ratings agentligi tomonidan baholangan tokenlashtirilgan likvidlik fondini taqdim etdi. Fidelity USD Digital Liquidity Fund (FILQ) deb nomlangan ushbu yangi mahsulot Chainlink blokcheyn infratuzilmasi asosida va Sygnum Bank tokenizatsiya platformasi orqali chiqarildi. Bu haqda Cointelegraph.com xabar beradi.
Sygnum ma’lumotlariga ko‘ra, fond Moody’s Ratings tomonidan AAA-mf reytingiga loyiq deb topildi. Bu ko‘rsatkich pul bozori fondlari uchun yuqori kredit sifati va likvidlikni anglatadi. Sygnum tokenizatsiya bo‘limi rahbari Fatmire Bekiri ushbu qadam kapital bozorlari evolyutsiyasida muhim bosqich ekanligini va tokenlashtirilgan mahsulotlar an’anaviy moliya tizimini blokcheyn bilan samarali bog‘lashini ta’kidladi.
Hamkorlik doirasida Chainlink fondning sof aktivlar qiymati (NAV) va taqsimot ma’lumotlarini on-chain tarzda taqdim etadi. Bu xalqaro investorlarga fond qiymati va to‘lovlarni real vaqt rejimida kuzatib borish imkonini beradi. Shuningdek, JPMorgan fond uchun tasdiqlangan kunlik NAV ma’lumotlarini yetkazib beruvchi hamkor sifatida ishtirok etadi.
Ushbu tashabbus yirik aktivlarni boshqaruvchi kompaniyalarning an’anaviy naqd pul va g‘aznachilik mahsulotlarini blokcheyn tarmoqlariga o‘tkazish tendensiyasini kuchaytirmoqda. Avvalroq BlackRock va Franklin Templeton kabi moliya gigantlari ham o‘zlarining tokenlashtirilgan pul bozori fondlarini ishga tushirgan edi.
“Zamin”ni Telegramʻda oʻqing!
