AQSH Qimmatli qogʻozlar va birjalar komissiyasi (SEC) komissari, kriptovalyuta sohasida “Kripto ona” nomi bilan tanilgan Hester Peirce oʻz lavozimini tark etib, Regent University yuridik fakultetiga dotsent sifatida ishga kiradi. Universitet xabariga koʻra, u noyabr oyidan boshlab oʻzining pedagogik faoliyatini boshlaydi. Bu haqda Cointelegraph.com xabar beradi.
Peirceʻning SECʻdagi vakolat muddati rasman 2025-yil iyun oyida tugagan boʻlsa-da, qoidalarga koʻra, komissarlar yangi nomzod tayinlangunga qadar yana 18 oygacha oʻz vazifalarini bajarishda davom etishlari mumkin. U agentlikka 2018-yilda Donald Trump maʼmuriyati davrida kelgan va 2020-yilda ikkinchi muddatga qayta tasdiqlangan edi.
Hester Peirce yuridik maktabda federal sud jarayonlari, qimmatli qogʻozlarni tartibga solish va raqamli aktivlar kabi yoʻnalishlarda akademik bazani mustahkamlashga yordam berishi kutilmoqda. Uning ketishi bilan SEC tarkibida faqat ikki nafar respublikachi komissar — Mark Uyeda va rais Paul Atkins qoladi.
Donald Trump 2025-yil yanvarida prezidentlikka kirishganidan beri SEC kripto sanoatini tartibga solishda oʻz yondashuvini tubdan oʻzgartirdi. Agentlik bir qator kripto kompaniyalarga nisbatan tergov va jazo choralarini toʻxtatdi. Hozirda SEC va CFTC oʻrtasidagi “regulyatorlar urushi”ni tugatish va sohani muvofiqlashtirilgan holda boshqarish choralari koʻrilmoqda.
AQSH Kongressida koʻrib chiqilayotgan CLARITY Act qonun loyihasi kripto bozorlarini nazorat qilish vakolatlarining katta qismini SECʻdan CFTCʻga oʻtkazishni nazarda tutadi. Shu bilan birga, har ikki agentlikda ham komissarlar yetishmovchiligi kuzatilmoqda, chunki koʻplab oʻrinlar hamon boʻsh qolmoqda.
“Zamin”ni Telegramʻda oʻqing!
