Janubiy Koreyaning Coinone kripto birjasi Korea Investment & Securities (KIS) va OKX Ventures platformaning 19,6 foiz ulushini sotib olish uchun jami 160 milliard von (taxminan 106 million USD) miqdorida investitsiya kiritishga kelishib olganini maʻlum qildi. Ushbu bitim tartibga soluvchi organlar tomonidan tasdiqlanishi kutilmoqda. Bu haqda Cointelegraph.com xabar beradi.
Mazkur investitsiya loyihasi doirasida KIS va OKX Ventures kompaniyalari Coinone platformasining bosh direktori Myung-Hun Cha va Com2uS Holdings kompaniyasidan keyingi uchinchi yirik aksiyadorga aylanadi. Kelishuvga koʻra, mavjud aksiyadorlardan ikkilamchi aksiyalarni sotib olish hamda yangi aksiyalar chiqarish koʻzda tutilgan. Myung-Hun Cha kompaniyaning eng yirik aksiyadori va boshqaruv nazoratini oʻzida saqlab qoladi.
Ushbu strategik hamkorlik OKX Ventures uchun Osiyoning eng qatʻiy tartibga solinadigan kripto bozorlaridan biriga kirish imkonini beradi. OKX vakillarining taʻkidlashicha, ushbu sheriklik kompaniyaning xavfsiz va qonuniy infratuzilmaga boʻlgan eʻtiborini aks ettiradi. KIS esa Janubiy Koreyada tokenlashtirilgan moliya qoidalari rivojlanib borayotgan bir paytda, Coinone bilan xavfsizlik tokenlari (STO) va stablecoin loyihalari ustida ishlashni rejalashtirmoqda.
Janubiy Koreyada 2024-yilda "Virtual aktivlar foydalanuvchilarini himoya qilish toʻgʻrisida"gi qonun kuchga kirganidan soʻng, kripto sektori ustidan nazorat sezilarli darajada kuchaydi. Upbit, Bithumb, Coinone va Korbit kabi birjalar endilikda jinoiy daromadlarni legallashtirishga qarshi kurash boʻyicha qatʻiy talablarga rioya qilishlari shart.
Shu bilan birga, Seul hukumati anʻanaviy moliya institutlarining raqamli aktivlar bozoriga kirishi uchun eshiklarni asta-sekin ochmoqda. Fevral oyida Mirae Asset Consulting kompaniyasi Korbit birjasining 92,06 foiz ulushini sotib olishga kelishgan edi, bu esa mamlakatda anʻanaviy moliya va kripto sektori integratsiyalashuvi kuchayib borayotganidan dalolat beradi.
“Zamin”ni Telegramʻda oʻqing!
