CertiK kiberxavfsizlik kompaniyasi maʼlumotlariga koʻra, may oyida kripto-platformalardagi xakerlik hujumlari natijasida koʻrilgan zararlar 68,3 million dollarni tashkil etdi. Bu koʻrsatkich aprel oyidagi 650 million dollarlik yoʻqotishga nisbatan qariyb 90 foizga kamdir. Shunday qilib, may oyi joriy yilda zarar miqdori 100 million dollardan past boʻlgan uchinchi oyga aylandi. Bu haqda Cointelegraph.com xabar beradi.
Oʻtgan oy davomida oʻgʻirlangan mablagʻlarning taxminan 2,6 million dollari fishing hujumlari hissasiga toʻgʻri kelgan boʻlsa, 9,4 million dollar miqdoridagi mablagʻ qaytarib olingan yoki tiklangan. Aprel oyida Kelp DAO platformasidan 291 million dollar oʻgʻirlanishi oylik koʻrsatkichlarni keskin oshirib yuborgan edi, biroq may oyida vaziyat sezilarli darajada barqarorlashdi.
May oyidagi eng yirik talofat 18-may kuni Verus Protocol kross-cheyn koʻprigida sodir boʻlib, xakerlar 11,5 million dollarni qoʻlga kiritishdi. Ikkinchi oʻrinda THORChain protokoli qayd etildi — undan 10,1 million dollar oʻgʻirlangan. Tahlillarga koʻra, yoʻqotishlarning 66 foizi yoki 45 million dollari dasturiy kodlardagi zaifliklar tufayli yuzaga kelgan.
Hujumlar turlari boʻyicha kross-cheyn koʻpriklar eng koʻp nishonga olingan boʻlib, umumiy zararning 42 foizi (28,6 million dollar) aynan shu yoʻnalishga toʻgʻri keldi. Shuningdek, hamyonlar va shaxsiy kalitlar (private keys) xavfsizligining buzilishi natijasida 13,7 million dollar yoʻqotilgan. DeFi protokollari ham firibgarlar diqqat markazida qolmoqda.
DeFiLlama maʼlumotlariga koʻra, may oyida jami 29 ta noxush holat qayd etilgan. Shuningdek, sunʼiy intellekt yordamida yaratilgan zararli dasturlar xavfi ortib bormoqda. Firibgarlar Google platformasidagi soxta reklamalar va AI kodlash yordamchilari orqali kripto-ishlab chiquvchilarni nishonga olmoqda.
“Zamin”ni Telegramʻda oʻqing!
