Xalq bahosi — asosiy mezon: davlat xizmatlariga nisbatan yangi tizim joriy etiladi

Yangi farmonga asosan, 2026 yil 1 yanvardan boshlab barcha davlat xizmatlari tuman va shahar miqyosida aholining bevosita bahosi asosida baholanadigan yangi tizim joriy qilinadi.

Bu nima degani?

Endi xalq qaysi davlat organi qanday ishlayotganini o‘zi baholaydi va natijalar asosida vazirlik, idora rahbarlari hamda hokimlar shaxsiy javobgarlikka tortiladi.

Javobgarlik kuchayadi, sun’iy intellekt joriy etiladi

Yana bir muhim yangilik — sun’iy intellekt asosida ishlaydigan onlayn platforma ishga tushiriladi. Bu xizmat fuqarolarga oddiy, tez va qulay tarzda mobil telefoni orqali turli muammolariga javob topish imkonini beradi.

Iqtisodiyotda ochiqlik va shaffoflik — birinchi o‘rinda

Farmonda korrupsiyaning oldini olishga qaratilgan qator mexanizmlar ham nazarda tutilgan. Jumladan:

• Davlat xaridlarida tovar yoki xizmat narxi bozor narxidan ortiqcha bo‘lsa, shu yo‘l bilan xarid amalga oshirgan mansabdor javobgarlikka tortiladi.
  
• 2025 yil 1 iyuldan yirik investitsiya loyihalarida xalqaro antikorrupsiya standartlari va auksionlarning raqobatbardoshlik ekspertizasi joriy etiladi.
  
• “Shaffof qurilish” milliy axborot tizimi qamrovi kengaytirilib, u xalqaro loyihalarga ham bosqichma-bosqich tatbiq etiladi.
  

2025 yil oxirigacha qanday o‘zgarishlar bo‘ladi?

Xalqaro tender obyektlari bo‘yicha subpudratchilar “Shaffof qurilish” tizimi orqali jalb qilinadi.

Qiymati 2 mln dollargacha bo‘lgan tenderlar, agar ular xalqaro moliya tashkilotlari tomonidan moliyalashtirilsa, faqat shu tizim orqali o‘tkaziladi.

Xalqaro tenderni yutgan chet el kompaniyalari, shartnoma qiymatining kamidan 60 foizini o‘zlari bajarishlari shart bo‘ladi — bunda "faqat nomiga kelishib, ishni boshqaga topshirish" amaliyotiga chek qo‘yiladi.

Siz nima deb o‘ylaysiz — yangi tizim rahbarlar ishini yaxshilaydimi? Xalq baxosi haqiqiy o‘zgarishlarga olib keladimi? “Zamin”ni Telegramʻda oʻqing!