Xorazm viloyatida haqiqatni yopish uchun turli ayyor yo‘llarni qo‘llagan, o‘z lavozimidan foydalanib shaxsiy manfaat ko‘rgan shaxs qo‘lga olindi. Ma’lumotlarga ko‘ra, Gurlan tumanidagi “Soliq servis” davlat unitar korxonasida bosh mutaxassis sifatida faoliyat yuritgan ushbu shaxs hech qayerda ishlamaydigan fuqarolarga sun’iy ravishda mehnat staji va ish haqi ko‘rsatilgan hujjat tayyorlab berish bilan shug‘ullangan.
Tergov organlariga yetib kelgan ma’lumotga ko‘ra, u o‘z tanish-bilishlaridan foydalanib, soliq organlaridagi aloqalari orqali ikki nafar mahalliy fuqaroga qonuniy asosga ega bo‘lmagan ma’lumotnoma rasmiylashtirishni taklif qilgan. Ushbu “hizmat” doirasida 2025 yilning yanvaridan iyun oyigacha davr mobaynida go‘yo ular rasman ishlab turgani va ish haqi olgani haqidagi ma’lumotlar tuzib berilgan.
Davlat xavfsizlik xizmatining Xorazm viloyati bo‘yicha boshqarmasi, Iqtisodiy jinoyatlarga qarshi kurashish departamenti bilan hamkorlikda o‘tkazgan tezkor tadbirda aybdor shaxs 12 million 500 ming so‘m pora olgan vaqtida qo‘lga olingan. Bu jarayon uning qilmishiga dalil sifatida rasman qayd etildi.
Tadqiqotchilar ta’kidlashicha, bunday holatlar faqat qonunbuzarlik emas, balki tizimga bo‘lgan ishonchni ham jiddiy zaiflashtiradi. Chunki mehnat staji — har bir fuqaroning nafaqasi, ijtimoiy kafolatlari va kelajakdagi moliyaviy xavfsizligi uchun asosiy omil hisoblanadi. Unga yolg‘on yozuvlar kiritish nafaqat shaxsiy manfaat uchun, balki davlat manfaatlariga ham zarar yetkazadi.
Hozirda aybdor shaxsga nisbatan jinoyat ishi qo‘zg‘atilgan va tergov harakatlari olib borilmoqda. Tergov natijasiga ko‘ra, unga qonun oldida qanday javobgarlik belgilanishi ma’lum bo‘ladi.
Mutaxassisning bunday qilmishi jamoatchilik orasida ham qizg‘in muhokamaga sabab bo‘ldi. Ayrimlar bu kabi holatlar aslida faqat shaxsning emas, balki tizimning ichki nazorat muammolarini ham ochib berishiga urg‘u bermoqda.
“Zamin”ni Telegramʻda oʻqing!
