O‘zbekiston prezidenti tashabbusi bilan bu yil 100 nafar vatandosh “Prezident hojisi” sifatida Haj safariga bepul yuborilmoqda. Bu xayrli tashabbus yurtimizda ko‘p yillar davomida xalqqa, jamiyatga va turli sohalar rivojiga sidqidildan xizmat qilgan insonlarga katta e’tibor va hurmat namunasi sifatida baholanmoqda.
Ma’lum qilinishicha, Haj safari uchun bepul yo‘llanmalar joylarda tantanali tarzda o‘z egalariga topshirilmoqda. Bu haqda “O‘zbekiston 24” telekanali xabar berdi. Yo‘llanma olganlar orasida oddiy mehnatkashlardan tortib, ilm-fan, tibbiyot, xizmat ko‘rsatish va diniy soha vakillarigacha borligi alohida ta’kidlanmoqda.
Musulmonlar idorasi raisining birinchi o‘rinbosari Homidjon Ishmetbekovning aytishicha, mazkur ro‘yxatga hayotini yurt va xalq xizmatiga bag‘ishlagan, munosib deb topilgan insonlar kiritilgan. Uning so‘zlariga ko‘ra, bu voqea O‘zbekiston tarixida o‘ziga xos ahamiyatga ega.
“Yurtimiz, xalqimiz uchun xizmat qilib umrini o‘tkazgan, loyiq-munosib bo‘lganlardan 100 nafarini muhtaram yurtboshimiz bu yil Haj safariga yuboryapti. O‘zbekiston O‘zbekiston bo‘libdiki, bunaqa voqeani ko‘rmagan”, — dedi Homidjon Ishmetbekov.
U, shuningdek, Hajga bepul yo‘llanma olganlar orasida jamiyatning turli qatlamlari vakillari borligini qayd etdi. Oddiy farrosh, xizmatchi, olim, tabib, shifokor va og‘ir davrlarda diniy sohada mehnat qilgan insonlarning yaqinlari ham ushbu safarga yo‘l olayotgani aytildi.
Bu jihat tashabbusning ma’naviy ahamiyatini yanada oshiradi. Chunki Haj safari ko‘pchilik musulmonlar uchun umrlik orzu, qalbda saqlanadigan katta niyat hisoblanadi. Bunday imkoniyatning xalq xizmatida bo‘lgan insonlarga taqdim etilishi ularning mehnati, sabri va fidoyiligi qadrlanayotganini ko‘rsatadi.
Eslatib o‘tamiz, joriy yilda O‘zbekistondan 15 ming nafar ziyoratchi Haj safariga yo‘l olmoqda. 2 maydan 18 mayga qadar mamlakatimizdagi 9 ta aeroportdan Madina shahriga parvozlar amalga oshirilmoqda.
Ma’lumot uchun, bu yil Haj safari narxi 77 million so‘m etib belgilangan. Shu nuqtayi nazardan, 100 nafar vatandoshning “Prezident hojisi” sifatida bepul yuborilishi ular va oilalari uchun juda katta quvonch, ma’naviy rag‘bat va unutilmas voqea bo‘lishi shubhasiz.
Qisqasi, bu tashabbus xalqqa xizmat qilgan insonlarni e’zozlash, ularning yillar davomidagi mehnatini qadrlash va ezgu orzularini ro‘yobga chiqarish yo‘lidagi muhim qadam bo‘ldi. Haj safariga otlanayotgan vatandoshlarimizga esa ibodatlari qabul, safarlari xayrli va xotirlari nurli bo‘lishini tilaymiz.
“Zamin”ni Telegramʻda oʻqing!
