Pushkin davlat sanʼat muzeyida italiyalik mashhur rassom Jovanni Franchesko Barbyeri — Gercinoning “Madonna va bola” kartinasi ilk bor namoyish etildi. Asarni 2025 yil 14 sentabrgacha muzeyning bosh binosida ko‘rish mumkin.
“TASS” xabariga ko‘ra, tuvalning taqdiri qariyb bir asr davomida noma’lum bo‘lgan. Endilikda u “Pushkin muzeyining yangi durdonalari” loyihasi doirasida namoyish qilinmoqda. Muzey direktori Olga Galaktionovaning aytishicha, Gercinoning ushbu asari loyihaning dastlabki besh ko‘rgazmasini yakunlab, keyin asosiy ekspozitsiyaga o‘tkaziladi.
Tarixiy manbalarga ko‘ra, avval rasm imperator Napoleonning rafiqasi Jozefinaga tegishli bo‘lgan. U uni antiqa buyumlar sotuvchisi Lyudoviko Variskodan sotib olgan. Keyinchalik asar qizi Hortensiyaga o‘tgan. 1820 yilda esa imperator Aleksandr I uni Ermitaj kolleksiyasi uchun Rossiyaga olib kelgan.
1924 yilda G‘arbiy Yevropa rasmlari Ermitajdan hozirgi Pushkin muzeyiga topshirilganida, Gercinoning asari muzeyga emas, balki Davlat muzey fondining markaziy omboriga yuborilgan. 1980 yillarda esa tuval rassom Ilya Glazunov qo‘lida bo‘lgan, keyinchalik qizi Vera Glazunova tomonidan muzeyga qaytarilgan.
Eslatib o‘tamiz, yaqinda ingliz ayol 50 yildan ortiq vaqt davomida qo‘lida saqlagan XVI asrga oid Antonio Solarioning “Madonna va bola” asarini Italiya muzeyiga qaytarishga rozi bo‘lgandi.
