Aktrisa Zarina Yo‘ldosheva “Navo” telekanalida namoyish etilgan “Mehmonda” ko‘rsatuvida shaxsiy hayoti, ijodiy faoliyati va oilasi bilan bog‘liq ta’sirli xotiralari haqida gapirdi. Suhbat davomida u nega hanuz turmush qurmagani, onasiga bergan va’dasi hamda reklama orqali qo‘lga kiritgan katta yutug‘i haqida ochiqchasiga so‘zlab berdi.
Aktrisaning aytishicha, u o‘zini bloger emas, avvalo san’atkor sifatida ko‘rishlarini istaydi. Ijtimoiy tarmoqlarda faol bo‘lsa-da, uning asosiy maqsadi aktrisalik faoliyati orqali muxlislar mehrini qozonish bo‘lgan.
— Ko‘pchilik meni bloger sifatida qabul qiladi. Lekin men bunday atalishini unchalik yoqtirmayman. Men uchun eng muhimi — aktrisa sifatida tanilishim, deydi Zarina Yo‘ldosheva.
Uning ta’kidlashicha, Instagram’dagi kuzatuvchilari soni ortishi ortidan turli reklamaviy takliflar kela boshlagan. Ayniqsa, “Nomus” seriali ommalashgach, aktrisaga yirik loyihalardan takliflar ko‘paygan.
— Reklama orqali qo‘lga kiritgan eng katta boyligim — uy bo‘lgan. Bir qurilish kompaniyasi meni loyiha yuzi sifatida tanladi va evaziga keng xonadon taqdim qildi. Pul tez sarflanadi, lekin uy inson bilan qoladi, deydi u.
Suhbat davomida aktrisa shaxsiy hayoti haqida ham to‘xtalib, oila qurish masalasiga jiddiy yondashishini aytdi. Uning fikricha, inson turmush qurishdan oldin tanlagan insonini chin dildan yaxshi ko‘rishi va uning kamchiliklarini ham qabul qila olishi kerak.
Eng ta’sirli jihatlardan biri esa aktrisaning marhum onasiga bergan va’dasi bo‘ldi. Zarinaning aytishicha, u ukalari va singlisi uchun o‘z baxtini orqaga surgan.
— Onam hayotlik paytida ukam va singlimga qarashga ko‘p yordamlashardim. Ularga ham ona, ham opa bo‘lishga harakat qilganman. Shuning uchun avval ularni oyoqqa turg‘izib, uyli-joyli qilishni maqsad qildim. Onamga ham shu haqda so‘z berganman, deydi aktrisa.
Uning so‘zlariga ko‘ra, hatto yaqinlari “avval sen turmush qur” deb ko‘p marta maslahat bergan. Ammo Zarina Yo‘ldosheva o‘z qaroridan qaytmaganini va avval oila a’zolarining kelajagini ta’minlashni ustuvor deb bilganini ta’kidladi.
