Britan radiosi Madonnani o‘z eshituvchilari uchun keksalik qiladi deb hisobladi

Buyuk Britaniyaning eng yirik radiostansiyasi BBC Radio 1 56 yoshli qo‘shiqchi Madonnani hozirgi kunda ommabop emas va o‘z eshituvchilari uchun urfdan qolgan deb hisoblab, uning “Living For Love” (“Sevgi uchun yashash”) nomli qo‘shig‘ini efirdan olib tashladi.

The Daily Mail nashrining yozishicha, pop-musiqa yo‘nalishiga ixtisoslashgan Radio 1 radiostansiyasining yarim auditoriyasini 15 yoshdan 29 yoshgacha bo‘lgan yoshlar tashkil qiladi. Madonnaning vakillari bu vaziyatga munosabat bildirishmagan.

Shunga qaramasdan, BBC Radio 1 radiostansiyasining vakili qo‘shiqchining yoshi uning ijrosidagi qo‘shiqning pleylistga kiritilishida hal qiluvchi omil emasligini ta’kidlab o‘tdi.

“Qo‘shiqlar musiqa ijrochisining xizmatlari hamda unga bizning yosh auditoriyamiz munosabatidan kelib chiqib tanlanadi”, deydi ushbu vakil.

Qayd etish kerak, radiostansiya efirida 72 yoshli Pol Makkartnining ikkita qo‘shig‘i berib boriladi.

Ma’lumot uchun, Madonnaning ushbu qo‘shig‘i mart oyida sotuvga chiqariladigan uning yangi “Rebel Heart” albomidan joy olgan. Yangi albomdagi musiqiy materialning katta qismi internetga chiqib ketgani tufayli, ushbu kompozitsiya qo‘shiqchi tomonidan o‘tgan yilning dekabr oyida, muddatidan avval taqdim etilgan edi.

Manba: www.kun.uz