Le Figaro gazetasida O‘zbekiston haqida maqola chop etildi

2024 yil 3 aprel kuni Fransiyaning yetakchi nashrlaridan biri bo‘lgan Le Figaro gazetasida O‘zbekistonning jadal iqtisodiy taraqqiyoti, xalqaro hamkorlikdagi muvaffaqiyatlari va investitsiya muhiti haqida maqola e’lon qilindi. Maqolada mamlakatning barqaror rivojlanish yo‘li, moliyaviy tizimi va iqtisodiy islohotlari alohida ta’kidlangan.

O‘zbekiston – tez rivojlanayotgan iqtisodiyot

Maqolada qayd etilishicha, O‘zbekiston jahon iqtisodiyotida o‘zining innovatsion rivojlanish modeli bilan ajralib turibdi. Mamlakatda barqaror moliyaviy tizim, kam ishsizlik va tadbirkorlar uchun qulay muhit mavjud. Shuningdek, O‘zbekiston 2030 yilgacha mo‘ljallangan milliy rivojlanish strategiyasi asosida o‘z taraqqiyot yo‘lini belgilagan.

Yevropa Ittifoqi va Markaziy Osiyo hamkorligi

Maqolada Yevropa Ittifoqi va Markaziy Osiyo davlatlari o‘rtasidagi birinchi sammit aynan O‘zbekistonning Samarqand shahrida o‘tkazilayotgani ta’kidlangan. Bu, o‘z navbatida, Yevropa davlatlarining mintaqaga bo‘lgan katta qiziqishi va hamkorlikni kuchaytirish istagini ko‘rsatadi.

Sammitda Yevropa Kengashi prezidenti Antoniu Koshta va Yevropa Komissiyasi prezidenti Ursula fon der Lyayen ishtirok etayotgani xalqaro munosabatlardagi yangi bosqichni ifoda etadi. O‘zbekiston prezidenti Shavkat Mirziyoyevning tashabbuslari mintaqadagi hamkorlikni yanada mustahkamlash va investitsiya muhitini yaxshilashga qaratilgani ta’kidlangan.

O‘zbekiston va Fransiya munosabatlari mustahkamlanmoqda

Maqolada O‘zbekiston va Fransiya o‘rtasidagi iqtisodiy va madaniy sohalardagi hamkorlik sezilarli darajada o‘sgani qayd etilgan. Fransuz kompaniyalari O‘zbekistonda sanoat, transport, energetika va atrof-muhit muhofazasi kabi sohalarda faoliyat olib bormoqda.

Bundan tashqari, Parijda Prezident Shavkat Mirziyoyev va Fransiya prezidenti Emmanuel Makron ishtirokida franko-o‘zbek madaniy hamkorligini rivojlantirishga bag‘ishlangan tadbirlar o‘tkazilgani ta’kidlangan. Bu kabi tashabbuslar ikki davlat o‘rtasidagi aloqalarni yanada mustahkamlashga xizmat qilmoqda.

Erkin iqtisodiy zonalar – xorijiy investitsiyalar uchun muhim platforma

Maqolada O‘zbekistondagi erkin iqtisodiy zonalar (EIZ) xorijiy sarmoyadorlar uchun katta imkoniyatlar yaratayotgani ta’kidlangan. Ushbu zonalar:

• Yangi ish o‘rinlarini yaratish
  
• Yashil iqtisodiyotni rivojlantirish
  
• Qulay soliq va tarif imtiyozlarini taklif etish
  

orqali O‘zbekistonning global iqtisodiyotdagi mavqeini mustahkamlashda muhim rol o‘ynayotgani qayd etilgan.

Le Figaro gazetasida chop etilgan ushbu maqola O‘zbekistonning xalqaro hamjamiyatda tobora muhim o‘rin egallayotganini ko‘rsatadi. Mamlakatning iqtisodiy islohotlari, xalqaro hamkorlik va sarmoyaviy muhitni yaxshilash bo‘yicha tashabbuslari Yevropa davlatlari, xususan, Fransiya tomonidan yuqori baholanmoqda. Shuningdek, Samarqandda o‘tkazilayotgan Yevropa Ittifoqi – Markaziy Osiyo sammiti O‘zbekistonning mintaqa va jahon miqyosidagi o‘rni tobora mustahkamlanayotganidan dalolat beradi. “Zamin” yangiliklarini “Telegram”da kuzatib boring