17 xorijiy IT kompaniya O‘zbekistonda ofis ochadi

2025-yil 21–23-may kunlari Toshkentda o‘tkazilgan “Tochka rosta” xalqaro forumi O‘zbekiston IT sohasi uchun muhim voqea bo‘ldi, deb UPL.uz xabar berdi.
O‘zbekiston Raqamli texnologiyalar vazirligi ma’lumotiga ko‘ra, 17 ta xorijiy IT kompaniya IT Park rezidenti bo‘lib, mamlakatda o‘z vakolatxonalarini ochishga qaror qilgan.

Forum davomida raqamli iqtisodiyot rivoji istiqbollari muhokama qilindi va investorlarni O‘zbekiston imkoniyatlari bilan tanishtirishga katta e’tibor qaratildi.

Tadbirda 160 dan ortiq davlat va xususiy IT kompaniyalar, digital agentliklar, mobil o‘yin ishlab chiquvchilar va kreativ studiyalar ishtirok etdi.
Texnologiyalar rivoji uchun O‘zbekistonda yaratilgan shart-sharoitlar mehmonlarga namoyish etildi. Raqamli texnologiyalar vaziri o‘rinbosari Oleg Pekos va IT Park bosh direktori Abdulaxad Quchqorov chiqish qildi. Ular “nol xavf” dasturi va IT Park ekotizimi haqida ma’lumot berdi.

Forum doirasida 5 ta kompaniya “yagona darcha” tizimi orqali o‘z yuridik shaxsini ro‘yxatdan o‘tkazdi. Yana 12 ta tashkilot yaqin orada IT Park rezidenti maqomini olish uchun ariza topshirishini ma’lum qildi.

Forum sahnasida taniqli kompaniyalar vakillari ham chiqish qildi. Masalan, Voice Solutions VB rahbari o‘z tajribasini baham ko‘rdi. Forward Gateway mobil o‘yin ishlab chiqaruvchilari va Artcraft kreativ studiyasi ham o‘z ishlanmalari bilan o‘rtoqlashdi.

2019-yilda tashkil etilgan IT Park hozirda 400 dan ortiq rezident kompaniyaga ega. Ulardan taxminan 30% xorijiy kompaniyalardir. “Zamin”ni Telegramʻda oʻqing!