Vashingtonda bo‘lib o‘tgan rasmiy uchrashuvda O‘zbekiston prezidenti Shavkat Mirziyoyev AQSh prezidenti Donald Trampga ikkita sovg‘a taqdim etdi, deb xabar berdi Gazeta.
Oq uyda o‘tgan muzokaralar paytida stol ustida Registon majmuasining tilla rangdagi kichik maketi ko‘rindi. Bu sovg‘a O‘zbekistonning tarixiy merosi va milliy qadriyatlarini ifodalovchi ramziy in’om sifatida taqdim etilgan.
Shuningdek, prezident Mirziyoyev Trampga 1987-yilda nashr etilgan “The Art of the Deal” nomli kitobni ham topshirdi. Ushbu asar Donald Trampning jurnalist Toni Shvarts bilan hammualliflikda yozilgan birinchi kitobi bo‘lib, unda Trampning biznes tajribasi va hayot falsafasi aks etgan.
Tramp bu kitobni o‘zining eng sevimli asarlaridan biri deb atagan va uni “Injildan keyingi eng muhim kitobim” deya ta’riflagan edi.
Ikki yetakchining uchrashuvi ramziy sovg‘alar, madaniy ehtirom va o‘zaro hurmat ruhida o‘tdi. O‘zbekiston tomonidan taqdim etilgan Registon maketi esa ikki davlat o‘rtasidagi tarixiy yaqinlik va hamkorlik ramzi sifatida talqin qilinmoqda.
“Zamin”ni Telegramʻda oʻqing!
