O‘zgidromet maʼlumotlariga ko‘ra, dushanba va seshanba kunlari O‘zbekistonning aksariyat hududlarida quruq hamda ancha iliq ob-havo saqlanib turadi. Kunduzgi haroratlar +25…+30 daraja atrofida bo‘lishi kutilmoqda, bahoriy issiq kunlar vaqtincha davom etadi.
14 aprel kuni g‘arbiy viloyatlarga nam havo oqimi kirib kela boshlaydi. Qoraqalpog‘iston Respublikasi, Xorazm viloyati va kechga yaqin Buxoro viloyatida yomg‘ir yog‘ishi ehtimoli yuqori bo‘lib, ayrim hududlarda momaqaldiroq kuzatilishi mumkin.
15–16 aprel kunlariga kelib nam havo massalari butun respublika bo‘ylab tarqaladi. Barcha hududlarda vaqt-vaqti bilan yomg‘ir yog‘adi, ayrim joylarda u kuchli tus oladi, baʼzi hududlarda momaqaldiroq bilan kuzatiladi. Shu davrda kunduzgi harorat keskin pasayib, +13…+16 daraja atrofiga tushishi kutilmoqda.
17 aprel kuni yog‘ingarchilik asosan markaziy va sharqiy viloyatlarda saqlanib qoladi. Ayrim hududlarda yomg‘ir va momaqaldiroq kuzatiladi. Shu bilan birga, baland tog‘li hududlarda 15–17 aprel kunlari yomg‘irning qorga aylanishi ehtimoli ham bor.
14 aprelda Qoraqalpog‘iston, Xorazm va Buxoro viloyatlarida, 15–16 aprel kunlari esa butun respublika bo‘ylab kuchli shamol esishi kutilmoqda. Shamol tezligi 15–20 m/s gacha, ayrim joylarda esa 25–28 m/s gacha kuchayishi mumkin. Baʼzi hududlarda chang-to‘zonli vaziyat ham kuzatilishi ehtimoldan xoli emas.
Tog‘oldi va tog‘li hududlarda sel va suv toshqinlari xavfi saqlanib qoladi, shu sababli aholi ehtiyotkorlikni oshirishi kerak.
Toshkent shahrida 13–14 aprel kunlari yog‘ingarchilik kutilmaydi, havo iliq bo‘lib, harorat +26…+29 daraja atrofida bo‘ladi. Shamol sharqdan yengildan o‘rtacha tezlikkacha esadi.
15–17 aprel kunlari poytaxtda ham vaziyat o‘zgaradi — vaqt-vaqti bilan yomg‘ir yog‘ib, momaqaldiroq kuzatiladi. Shamol 12–15 m/s gacha kuchayishi mumkin, kunduzgi harorat esa +13…+16 darajagacha pasayadi.
Xulosa qilib aytganda, bahoriy iliqlik o‘rnini tez o‘zgaradigan, salqin va nam ob-havo egallaydi.
“Zamin”ni Telegramʻda oʻqing!
