Ertaga 10 oktyabr kuni “Bunyodkor” stadionida azaliy raqiblar O‘zbekiston va Eron to‘qnashadi. Jahon chempionati saralashining 3-bosqichidan o‘rin olgan uchrashuv ikki jamoa uchun ham ahamiyatli hisoblanadi.
Uchrashuvni avstraliyalik Shon Evans boshchiligidagi hakamlar boshqarib borishadi. 36 yoshli referi 2017 yildan buyon FIFA hakami hisoblanadi.
Ikki turdan so‘ng ikki jamoa ham 6 ochko to‘plab guruhda peshqadamlikni saqlab turibdi. O‘yin natijasi guruhda kim yetakchi ekanini belgilab beradi.
Foto: Google Images
Dastlabki ikki uchrashuvda Eron Qirg‘iziston va BAA termalarini minimal 1:0 hisobida yengdi va shu bilan bir qatorda o‘z darvozasi daxlsizligini saqlab qoldi.
Mezbonlar esa o‘z uyida Shimoliy Koreyani kichik (1:0) hisobida yengdi, Qirg‘izistonda bo‘lgan uchrashuvda esa 2:1 hisobida ortda qilayotgan Katanes shogirdlari yakunda 2:3 hisobida g‘alabani tortib oldi.
Bu jamoalar ushbu saralashning ikkinchi bosqichida ham o‘zaro duch kelgan. O‘yinlarning ikkisi ham (2:2, 0:0) durang bilan yakunlangan.
O‘zaro o‘yinlar natijasi:
O‘zbekiston jamoasi Eron bilan 13 bor to‘qnash kelgan. Uchrashuvlarning 3 tasida durang qayd etilgan. 9 uchrashuvda Eron jamoasi g‘alaba qozongan. O‘zbekiston esa 2012 yili “Ozodi” stadionida bo‘lib o‘tgan uchrashuvda Baqoyevning goli evaziga Eronni mag‘lubiyatga uchratgan. O‘zbekiston hozirgacha o‘z uyida Eronni mag‘lubiyatga uchrata olmagan.
So‘nggi besh uchrashuv:
- Jahon chempionati saralashi. Eron — O‘zbekiston 0:0;
- Jahon chempionati saralashi. O‘zbekiston — Eron 2:2;
- CAFA-2023 musobaqasi. O‘zbekiston — Eron 0:1;
- O‘rtoqlik o‘yini. 2020 yil. O‘zbekiston — Eron 1:2;
- O‘rtoqlik o‘yini. 2018 yil. O‘zbekiston — Eron 0:1.
So‘nggi o‘yin natijalari
O‘zbekiston milliy jamoasi oxirgi 5 uchrashuvning 4 tasida g‘alaba qozondi, yagona durang aynan Eron jamoasi bilan qayd etildi. Uchrashuvlarda 10 ta gol kiritdi va 3 bora o‘z darvozasidan to‘p olib chiqdi. Qiziqarlisi 3 golga ham qo‘shnilarimiz mualliflik qildi (Qirg‘iziston o‘zbekistonliklar darvozasiga 2 bor yo‘l topdi, Turkmaniston esa bir marta).
Eron jamoasi ham 5 uchrashuvda O‘zbekiston natijasi bilan bir xil ko‘rsatkich namoyish etdi. O‘zbekiston bilan durang o‘ynagan Eron uch raqibini minimal 1:0 hisobida yengdi, Gongkong bilan uchrashuv 2:4 hisobida yakunlandi. Eron 5 o‘yinda raqiblar darvozasiga 7 bor yo‘l topdi va 2 bor raqiblarga gol urish imkonini berdi.
Yo‘qotishlar
Mezbonlar tarkibida Oston O‘runovning mazkur uchrashuvda qatnashishi so‘roq ostida qolmoqda. Eron chempionatida o‘ynayotgan tajribali hujumchi mashg‘ulotlarga qatnashayotganini inobatga olsak, uning uchrashuvda qatnashish imkoni ham bor. Qolgan legionerlar ham tarkibga qo‘shilgan. Dastlabki ikki o‘yinni jarohat sabab o‘tkazib yuborgan himoyachi Abduqodir Husanov ham optimal formada, o‘yinga tayyor.
Eng katta yo‘qotish bu — terma jamoaning bosh murabbiyi Srechko Katanes. U sog‘ligidagi muammo sabab uchrashuvga jamoani tayyorlay olmadi. Toshkentdagi ikki uchrashuvda uning yordamchilari futbolchilarga ko‘rsatmalar beradi. Ammo murabbiy yordamchilarining xabar berishicha, ertaga bosh murabbiy bilan aloqa o‘rnatiladi.
Eron jamoasi hujumkor tarkib bilan Toshkentga keldi. Ulardagi eng katta yo‘qotish himoya pozitsiyasida hisoblanadi. Eron terma jamoasi hamda “Persepolis” jamoasining tajribali himoyachisi Muhammad Huseyn jarohat sabab ushbu uchrashuvda maydonga tushmaydi. 30 yoshli himoyachi 2015 yildan beri jamoa himoyasida o‘ynab keladi. 55 uchrashuvda maydonga tushgan futbolchi 6 bor raqiblar darvozasiga yo‘l topgan.
Foto: Getty Images
Eng qimmat o‘yinchilar
Foto: Transfermarkt
Eron jamoasining Italiyaning “Inter” klubida o‘ynovchi hujumchisi mamlakatning eng qimmat o‘yinchisi hisoblanadi. Transfermarkt portali uni 10 million yevroga baholagan. Ikkinchi o‘rinni Sardor Azmun egallab turibdi. “Shabab al-Ahli” jamoasining hujumchisi 8 million yevro narxga ega. Uchinchi o‘rindagi Mehdi Gayedi 4 millionga baholangan.
Foto: Tranfermarkt
O‘zbekiston tarkibidagi Abbosbek Fayzullayev Rossiyaning “SSKA” klubida to‘p suradi. Portal uning transfer qiymatini 6 million yevroga baholagan. “Lans” klubi himoyachisi Abduqodir Husanov 5 millionlik qiymatga ega. Jamoa to‘purari va “Roma” klubi futbolchisi Eldor Shomurodov ham shunchaga baholangan.
Murabbiylar fikri
O‘zbekiston jamoasi bosh murabbiyi betobligi sabab uning yordamchisi Radmanovich o‘z fikrlarini bildirdi.
Foto: “O‘FA”
“Ertaga Eron bilan o‘ynaymiz. Ushbu jamoa bilan o‘yin doimo qiziq va qiyin bo‘lgan. Sababi Eron Osiyodagi yetakchi jamoalardan biri. Biz ular bilan ko‘p bora to‘qnash kelganmiz va ular haqida ko‘p narsa bilamiz. Afsuski, Katanes sog‘ligidagi muammo sabab qatnasha olmayapti. Biz uning yo‘qligini bildirmaslikka harakat qilamiz.
O‘yinga taktikani ertangi o‘yin oldidan mashg‘ulotda futbolchilarning jismoniy va psixologik holatidan kelib chiqqan holda tanlaymiz. Hujumkor yoki himoyaviy o‘yin ko‘rsatishimiz o‘shanda ma’lum bo‘ladi”, dedi murabbiy.
Foto: “O‘FA”
Eron murabbiyi Toshkentga g‘alaba uchun kelganini yashirib o‘tirmadi.
“Hozir bor e’tiborimiz O‘zbekistonga qarshi bahsga qaratilgan. Shuni aytishim mumkinki, Eron — dunyodagi eng yaxshi va tinch mamlakatlardan biri.
Tashqi narsalarga chalg‘imay, bor e’tiborimizni futbolga qaratishimiz, tomoshabop o‘yin ko‘rsatishimiz va Toshkentdan 3 ochko olib ketishimiz kerak. Himoyamizdagi yo‘qotishlar? Dastlabki ikki turda “quruq o‘yin” o‘tkazdik va ertaga ham bu seriyani davom ettirishga urinamiz”, dedi forslar bosh murabbiyi.
O‘yin haqida
Mehmonlar uch ochko uchun o‘ynaymiz deyishiga qaramay, ertaga ehtiyotkor o‘yin namoyish etishini taxmin qilish mumkin. Sababi O‘zbekiston jamoasi o‘z uyida ancha ishonchli harakat qilmoqda. Bundan tashqari, asosiy himoyachining yo‘qligi bois jamoa hujumlarini himoyadan tashkillashtirishini, O‘zbekistonning xatosini kutishini taxmin qilish mumkin.
O‘zbekiston jamoasi markaziy himoyada Abduqodir Husanovning borligini inobatga olgan holda, Abbosbek Fayzullayev va Jaloliddin Masharipovning “reydlari”, yoki Husniddin Aliqulovning bosh bilan ishonchli o‘yini evaziga uchrashuvda g‘alaba qozonishi mumkin. Ushbu o‘yinda O‘zbekiston ehtiyotkor, shu bilan birga tartibli va hujumkor o‘yini ko‘rsatishini kutish mumkin.
Ma’lumot uchun, uchrashuv Toshkentda, “Bunyodkor” stadionida bo‘lib o‘tadi. O‘yin 19:00 da boshlanadi.
Бунёдкор стадиони, Ўзбекистон, Эрон, Жаҳон чемпионати, Саралаш “Zamin” yangiliklarini “Youtube”da kuzatib boring
Ctrl
Enter
Xato topdIngizmi?
Iborani ajratib Ctrl+Enter tugmasini bosingMavzuga oid yangiliklar
Medvedev: Maxsus harbiy operatsiya uchun qurollarning aksariyati Rossiyada ishlab chiqariladi
BAAda isroillik ravvin o‘ldirib ketildi
Ukraina Kursk oblastida egallab olgan hududlarining 40 foizdan ortig‘ini yo‘qotdi
Boy davlatlar iqlimni moliyalashtirishni oshirishga rozi bo‘ldi
Ukraina o‘zining ballistik raketasini yaratish ustida ish olib bormoqda
NATO bosh kotibi Donald Tramp bilan uchrashdi
27 noyabr kuni kuzatiladigan ob-havo to‘g‘risida ma’lumot
Shavkat Mirziyoyev Yangihayotda barpo etilayotgan “Yangi avlod” maxsus sanoat zonasida bo‘ldi
