Javohir Sindorov nufuzli turnir yarim finaliga yoʻllanmani qoʻlga kiritdi!

Grossmeyterimiz Javohir Sindorov nufuzli Freestyle Chess Grand Slam turnirining saralash bahslarida muvaffaqiyatli ishtirok etyapti.

Hamyurtimiz 20 nafar shaxmatchi qatnashgan saralash bahslarida 7,5 ochko bilan pley-off bosqichiga yoʻl oldi. Sindarov 6 gʻalaba va 3 durang bilan qoʻshimcha koʻrsatkichlarga koʻra 3-oʻrinni egalladi. Etti gʻalaba, 1 ta durang va 1 ta magʻlubiyat qayd etgan rossiyalik Denis Lazavik 7,5 ochko bilan 2-pogʻonadan joy oldi. Sloveniya sharafini himoya qilayotgan Vladimir Fedoseyev esa 8 ochko bilan 1-oʻrinni band etdi.

Javohir Sindorov pley-off bosqichini ham muvaffaqiyatli oʻtkazyapti. U 1/8 finalda xitoylik Vey Yini 1,5:0,5 hisobida magʻlubiyatga uchratdi. Chorak finalda esa hindistonlik grossmeyster Rameshbabu Praggnanandhaga hech qanday imkoniyat qoldirmadi - 2:0!

Afsuski, yana bir grossmeysterimiz Shamsiddin Vohidov saralash turnirida 9 imkoniyatdan 6 ochko (5 gʻalaba, 2 durang, 2 magʻlubiyat) toʻplab, qoʻshimcha koʻrsatkichlarga koʻra 19-oʻrin bilan kifoyalandi.

Bugun Javohir Sindarov 1/2 finalda yana bir xitoylik shaxmatchi - Yu Yang Yiga qarshi bahs olib boradi. Final uchrashuv ham bugunga belgilangan. Gʻolib shaxmatchi fevral oyida boʻlib oʻtadigan asosiy turnirga yoʻllanma oladi.

Ushbu turnirda Nodirbek Abdusattorov ham ishtirok etadi. Nodirbek yil davomida dunyoning bir nechta shahrida oʻtkaziladigan Freestyle Chess Grand Slam 2025 turnirining toʻgʻridan-toʻgʻri ishtirokchisiga aylangan. “Zamin” yangiliklarini “Telegram”da kuzatib boring