Yevropa futbolida yana bir qiziqarli taxmin – ingliz futbolining sobiq yulduzi, “Liverpul” va “Manchester Yunayted”ning mashhur hujumchisi Maykl Ouen yangi mavsumda qaysi jamoa chempionlikka erishishi mumkinligi haqida o‘z fikrini bildirdi, deb yozadi angliya nashrlari.
Ouenga ko‘ra, “Manchester Siti” yangi mavsumda ham Angliya Premer-ligasini yuta olmaydi. “Shaharliklar” o‘tgan mavsumda kutilmagan natijalar qayd etishdi va jamoada sezilarli o‘zgarishlar ro‘y berdi. So‘ngi transferlar davomida taklif qilingan futbolchilar jamoaga moslashishi uchun ma’lum vaqt talab etiladi. Shu sabab, Maykl Ouen yangi mavsumda “Siti” chempion bo‘ladi, deb o‘ylamaydi.
Mashhur sobiq futbolchi o‘z fikrida “Liverpul” jamoasiga ishonch bildirdi. “Men “Liverpul”dan katta natija kutaman. Agar kutilmagan vaziyatlar ro‘y bersa, “Arsenal” chempionlikni qo‘lga kiritishi mumkin. “Chelsi”da ham kichik imkoniyat bor, biroq mening fikrimcha, “Manchester Siti” bu safar chempionlik poygasida g‘olib chiqmaydi”, – deya ta’kidladi Maykl Ouen.
Eslatib o‘tamiz, “Siti” yangi mavsumdagi ilk rasmiy uchrashuvini safarda “Vulverxempton”ga qarshi o‘tkazadi. Yangi mavsumdagi har bir o‘yin muxlislar va ekspertlar uchun katta qiziqish uyg‘otmoqda – chempionlik uchun kurash yanada keskin tus oladi.
Yangi mavsumda qaysi jamoa favorit sifatida namoyon bo‘lishi va oldinga chiqishi vaqt o‘tishi bilan aniq bo‘ladi. Muxlislar esa o‘z sevimli jamoalariga muhim pallada kuchli qo‘llab-quvvatlash berishni davom ettirmoqda.
