Birlashgan Arab Amirliklarining Dubay shahrida davom etayotgan erkaklar o‘rtasidagi Jahon chempionati katta qiziqish bilan kuzatilmoqda. Musobaqaning beshinchi kuni ham yurtimiz uchun samarali kechdi — to‘rt nafar vakilimiz ringga ko‘tarilib, sharafli natijalar qayd etdi.
Shular orasida eng yorqin janglardan biri, shubhasiz, ikki karra Olimpiya chempioni Hasanboy Do‘smatovning maydonga chiqishi bo‘ldi. -51 kg vaznda jang qilgan hamyurtimiz turkiyalik raqibi Samet Gumus — 2024 yilgi Yevropa chempioniga qarshi kuch sinashdi. Qarshilik ko‘rsatish oson bo‘lmagan raqibga qaramay, Do‘smatov butun bahs davomida to‘liq ustunlik qildi.
Uch raund davomida tashabbusni qo‘ldan bermagan Hasanboy tezkor hujumlari, aniq zarbalari va tajribali taktikasi bilan to‘liq ustunlikni namoyish etdi. Haqli ravishda hakamlar ham yakdil qaror qabul qildi — 5:0, vakilmiz mutlaq g‘alaba bilan keyingi bosqichga yo‘l oldi.
Bu natija nafaqat muxlislar, balki jahon boks jamoatchiligi tomonidan ham yuqori baholandi. Chunki Do‘smatov har bir jangda Olimpiya chempioniga xos barqarorlik va mahoratni ko‘rsatmoqda.
Eslatib o‘tamiz, birozdan so‘ng yana bir bokschimizning muhim jangini tomosha qilamiz — Xo‘janazar Nortojiyev hindistonlik Sachinga qarshi ringga chiqadi. Bu bahs ham juda katta ahamiyatga ega bo‘lib, murabbiylar shtabi Nortojiyevdan ham yuqori natija kutishmoqda.
Yurtimiz boksi Dubayda yana bir bor o‘z so‘zini aytmoqda — nafaslar tiqilib, navbatdagi g‘alabalarni kutamiz!
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
