Namanganning «Navbahor» klubi yangi mavsumga tayyorgarlik doirasidagi ilk o‘quv-mashg‘ulot yig‘inini yakunlab, qisqa muddatli ta’tilga chiqdi. Temur Kapadze boshchiligidagi jamoa bir hafta davomida Toshkentda mashqlar olib borib, mavsum oldidan asosiy yo‘nalishlar ustida ishladi.
Klub matbuot xizmati ma’lum qilishicha, poytaxtda o‘tgan tayyorgarlikning birinchi bosqichi reja asosida o‘tdi. Yangi yil bayrami munosabati bilan futbolchilarga qisqa dam olish imkoniyati berildi, bu esa jamoaga navbatdagi yig‘inlarga to‘liq kuch bilan qaytish uchun xizmat qiladi.
«Lochinlar» 2026 yil 3 yanvar kuni yana Toshkentda jam bo‘ladi. 4 yanvardan boshlab jamoa a’zolari tibbiy ko‘rikdan o‘tib, ikkinchi bosqichdagi mashg‘ulotlarni rasman boshlaydi. Poytaxtdagi ushbu yig‘in 14 yanvargacha davom etishi rejalashtirilgan.
Shundan so‘ng «Navbahor» tayyorgarlikning asosiy qismini xorijda davom ettiradi. Jamoa oy o‘rtalaridan Turkiya yig‘iniga yo‘l olib, u yerda kuchli raqiblar bilan nazorat uchrashuvlari o‘tkazishi hamda jismoniy va taktik tayyorgarlikni yanada kuchaytirishi kutilmoqda.
Temur Kapadze jamoasi mavsumga jiddiy yondashmoqda. Qisqa ta’tildan keyingi yig‘inlar «Navbahor»ning yangi chempionatda oldiga qo‘ygan katta maqsadlariga mustahkam poydevor bo‘lishi kutilyapti.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
