O‘zbekiston milliy jamoasi yarimhimoyachisi Jaloliddin Masharipov 5 oylik tanaffusdan keyin yana maydonga qaytdi. 32 yoshli futbolchi «Istiqlol» safida Eron chempionatining 10-turida «Sepahon»ga qarshi bahsda (2:1) 73-daqiqada zaxiradan o‘yinga qo‘shildi, ammo 90+6-daqiqada yana almashtirildi.
Bu holat ijtimoiy tarmoqlarda darrov turli taxminlarni chiqardi: go‘yo Masharipov yana jarohat olgan, degan gaplar aylanib ketdi. Ammo futbolchining o‘zi bu mish-mishlarga nuqta qo‘ydi.
Uning aytishicha, hech qanday jarohat bo‘lmagan, hammasi joyida. Almashinuv esa taktik qaror: jamoa ikkinchi golni urganidan keyin Masharipov murabbiyga o‘zi murojaat qilib, hisobni ushlab qolish uchun o‘rniga himoyachi tushirishni so‘ragan.
«O‘yindan chiqdik. Yana zaxiraga olinganimga jarohat oldi deb o‘ylashibdi. Jarohat olmadim, barchasi joyida. Ikkinchi golni urganimizdan so‘ng murabbiyga murojaat qilib, g‘alabani saqlab qolish uchun o‘rnimga himoyachi tushirishni so‘radim», — deya izoh berdi futbolchi.
Shuningdek, Masharipov bu uning jarohatdan keyingi ilk o‘yini ekanini ta’kidlab, xavotir olganlarga rahmat aytdi va yangi yil barcha uchun omadli, barakali bo‘lishini tiladi.
Qisqasi, muxlislar xotirjam bo‘lsa bo‘ladi: Masharipov qaytdi, jarohat yo‘q. Endi eng qizig‘i — u formaga to‘liq kirganda, «Istiqlol» ham, milliy jamoa ham yana bir “plyus” oladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
