“Navbahor” matbuot xizmati jamoaning Turkiyada o‘tayotgan qishki o‘quv-mashg‘ulot yig‘ini doirasidagi nazorat uchrashuvlari bo‘yicha muhim ma’lumotlarni ochiqladi. Avval xabar qilinganidek, “lochinlar” yangi mavsum oldidan tayyorgarlikning navbatdagi bosqichini o‘tkazish uchun Turkiyaga yo‘l olgan edi.
Ma’lum qilinishicha, yig‘in ikki bosqichda tashkil etilishi rejalashtirilgan. Bu jarayonda asosiy urg‘u aynan o‘yin amaliyotiga qaratilmoqda: murabbiylar shtabi jamoaning jismoniy holati, o‘yin tartibi va taktik yechimlarini turli raqiblar bilan bahslarda sinovdan o‘tkazishni ko‘zlagan. Shu maqsadda bir nechta nazorat-sinov uchrashuvlari belgilangan.
Matbuot xizmati “Navbahor”ning Turkiyadagi barcha sparring raqiblari hamda o‘yin sanalari ma’lum bo‘lganini bildirib, to‘liq ro‘yxatni taqdim etdi. Unga ko‘ra, namanganliklar quyidagi jamoalarga qarshi maydonga tushadi:
18 yanvar — “Napredak” (Serbiya)
22 yanvar — “Malisheva” (Kosovo)
28 yanvar — “FS Pelister” (Shimoliy Makedoniya)
8 fevral — “Rubin” (Rossiya)
12 fevral — “Aktobe” (Qozog‘iston), “Baltika” (Rossiya)
16 fevral — “Dinamo” (Tbilisi, Gruziya)
Ko‘rinib turibdiki, “lochinlar”ning tayyorgarlik dasturi juda ham sermazmun: raqiblar geografiyasi keng, uslublar turlicha, o‘yinlar soni esa murabbiylarga tarkibni har tomonlama tekshirish imkonini beradi. Bu sparringlar orqali jamoa yangi mavsumga qay darajada tayyor ekani, kim qanday formada ekani va qay pozitsiyalarda raqobat kuchliligi yanada aniq ko‘rinadi.
Endi esa eng qizig‘i — natijalar va maydondagi tasvir: “Navbahor” Turkiya yig‘inida qanday o‘yin qiladi, yangi mavsum oldidan qanday qiyofa namoyon etadi — buni nazorat uchrashuvlari ko‘rsatib beradi.
“Zamin”ni Telegramʻda oʻqing!
