O‘zbekiston milliy terma jamoasi tarixiy voqea — Jahon chempionatidagi ishtiroki oldidan hal qiluvchi tayyorgarlik bosqichiga kirishmoqda. Muxlislar intiqlik bilan kutayotgan mazkur yig‘inlar va bahslar taqvimi Vatanimiz bosh jamoasining mundialga yuqori shaylikda borishini ta’minlashga qaratilgan.
Toshkentdan Shimoliy Amerika sari
Tayyorgarlikning dastlabki qismi poytaxtimizda boshlanadi. 5 maydan 25 mayga qadar futbolchilarimiz Toshkentda o‘quv-mashg‘ulot yig‘inlarini o‘tkazishadi. Ushbu jarayonda murabbiylar shtabi mahalliy klublarga qarshi nazorat uchrashuvlari orqali futbolchilarning holatini ko‘zdan kechirib olishni rejalashtirgan.
Yig‘inning birinchi bosqichi yakunlangach, 26 may kuni delegatsiya Toshkentdan Nyu-Yorkka yo‘l oladi. Okean ortiga yetib borgan hamyurtlarimiz 27–29 may kunlari Amerikaning ushbu yirik megapolisida mashg‘ulotlarni davom ettirishadi.
Dunyo grandlari bilan o‘rtoqlik uchrashuvlari
Jahon chempionati oldidan futbolchilarimizning ruhiy va jismoniy holatini sinovdan o‘tkazish uchun ikkita jiddiy nazorat bahsi tashkil etiladi:
1 iyun: Kanada terma jamoasiga qarshi bahs. Uchrashuv Edmontondagi muhtasham «Commonwealth» stadionida bo‘lib o‘tadi.
8 iyun: Fabio Kannavaro shogirdlari Nyu-Yorkdagi «Icahn Stadium» maydonida kuchli Niderlandiya terma jamoasiga qarshi maydonga tushishadi.
Ushbu o‘yinlar jamoamiz uchun iqlimga moslashish va kuchli raqiblar bilan tajriba almashish uchun ajoyib imkoniyatdir.
Mundial manzili va guruh bosqichi taqvimi
Nazorat bahslaridan so‘ng, 10 iyun kuni terma jamoamiz Atlanta shahriga yetib boradi va Jahon chempionati davomida o‘zlari uchun asosiy qarorgoh bo‘ladigan bazaga joylashadi.
JCH–2026 doirasidagi guruh bosqichi o‘yinlari jadvali:
Sana | Raqib | O‘tkazilish joyi |
17 iyun | Kolumbiya | Mexiko (Meksika) |
23 iyun | Portugaliya | Hyuston (AQSH) |
27 iyun | Kongo DR | Atlanta (AQSH) |
Terma jamoamizga ushbu mas’uliyatli va tarixiy yurishda ulkan zafarlar tilab qolamiz! Zero, butun o‘zbek xalqining duolari va qo‘llab-quvvatlashi futbolchilarimizga qo‘shimcha kuch bag‘ishlaydi.
“Zamin”ni Telegramʻda oʻqing!
